भक्तपुर, १७ माघ २०७९सशस्त्र प्रहरी बलका भक्तपुर प्रमुख नरबहादुर रावतले रवाना लिएका छन् । नम्बर २२ गणको गणपति रहेका रावतलाई बिहीबार काठमाडौस्थित प्रधान कार्यालयको कार्य बिभागमा सरुवा गरिएको थियो । उनलाई भक्तपुरबाट भब्य बिदाई गरिएको छ । 
बिहीबार ९७ सशस्त्र प्रहरी उपरीक्षक (एसपी)को सरुवा गरेको सशस्त्र प्रहरी बलले रावतलाई भक्तपुरबाट मुख्यालयमा जिम्मेवारी दिएको हो । हसिलो र मिजासिलो ब्यवहारका कारण रावत आफ्नो संगठनमा मात्र नभई जिल्लामै प्रिय रहेका थिए । कलाकार समेत रहेका रावत स्थानीय र सर्वसाधारणसंग राम्ररी घुलमिल गर्दा सशस्त्र प्रहरी बलले जनस्तरमा सम्बन्ध बनाउन सफल बनेको थियो । पदीय रवाफ उनको कार्यसम्पादनमा नदेखिदा र सबैलाई समान ब्यवहार प्रदर्शन गर्ने स्वभावका कारण मातहतका सकल दर्जा उनीसंग असन्तुष्ट रहेका देखिएनन् । 
उनको नेतृत्वमा सशस्त्र प्रहरी बलले भक्तपुरको शान्ति सुरक्षा कायम राख्न, बिपद ब्यस्थापन गर्न र गत स्थानीय निर्वाचन एवं संघ र प्रदेशको निर्वाचन सफल पार्न महत्वपूर्ण कार्य गरेको निष्कर्षसहित नेतृत्वको उच्च मूल्यांकन गर्दै भक्तपुर सिडिओ रुद्रादेवी शर्माले सशस्त्र प्रहरी उपरीक्षक (एसपी) नरबहादुर रावतलाई प्रशंसा पत्र समेत प्रदान गरेकी थिइन् । रावतको स्थानमा एसपी दिनेश कुमार महत नम्बर २२ गणको गणपतिमा सरुवा भइ आएका छन् ।