भक्तपुर, २३ माघ २०७९ सुर्खेत जिल्लाबाट भक्तपुरमा सरुवा भई आएका भक्तपुरका प्रमुख जिल्ला अधिकारी खगेन्द्रप्रसाद रिजालको स्वागत गरिएको छ । आइतबार एक कार्यक्रमबीच भक्तपुर नगरपालिकाका प्रमुख सुनिल प्रजापतिले पुष्पगुच्छा, भादगाउँले टोपी र खादा ओढाइ स्वागत गरिएको हो ।
प्रमुख प्रजापतिले भक्तपुरको शान्ति सुरक्षा, जात्रा व्यवस्थापन, सांस्कृतिक सम्पदा सुरक्षालगायतका विषयमा जिल्ल्ला प्रशासन कार्यालय र नगरपालिकाबीच सहकार्य हुने विश्वास व्यक्त गरे । तीन तहको सरकारबीच सहकार्य र समन्वयको सिद्धान्तअनुसार अगाडि बढ्ने संवैधानिक व्यवस्था स्मरण गर्दै उनले भक्तपुरको दुधपाटीस्थित भाज्या पुखु परिसरको बाटो खोल्ने विषयमा गृहमन्त्रालयअन्तर्गतको जुद्ध बारुण यन्त्र परिसरको बाटो खोल्ने विषयमा सहकार्य र समन्वय हुने विश्वास व्यक्त गरे ।
ऐतिहासिक, सांस्कृतिक र राजनीतिक रुपले भक्तपुर महत्वपूर्ण थलो भएको बताउँदै अरु नगरपालिकाभन्दा शिक्षा, स्वास्थ्य, सम्पदा संरक्षण र सरसफाईमा विशिष्ट रहेको उल्लेख गरेका छन् ।
प्रजिअ रिजालले भक्तपुर नपासँग अरु स्थानीय तहले सिक्न लायक धेरै कामहरु भएको बताउँदै अन्तर्राष्ट्रिय जगतमा नेपाललाई चिनाउन भक्तपुरको धेरै ठूलो भूमिका भएको बताए । स्थानीय सरकार जनताको नजिकको सरकार भएको बताउँदै उहाँले भक्तपुरमा शान्ति सुरक्षा कायम गर्न जनप्रतिनिधि र स्थानीय जनतासँग हातेमालो गर्दै अगाडि बढ्ने प्रतिबद्धता जनाए ।