भक्तपुर, २ फागुन २०७९बागमती प्रदेशका मुख्यमन्त्री शालिकराम जमरकट्टेलले भक्तपुरलाई दीर्घकालीन लाभ हुने ठुला योजनाहरुमा प्रदेशले बजेट छुट्याइदिने बचन दिएका छन् । स्थानीय सरकारले पूरा गर्न नसक्ने ठुला योजना लिएर आउँन आग्रह गर्दै उनले आफूले कम्तिमा आधा दर्जन योजनालाई बजेट बिनियोजन गरिदिने बचन दिएका हुन् ।
मंगलवार नेकपा(माओवादी केन्द्र) को मध्यपुर थिमी नगर समितिको बधाई एवं सम्मान ग्रहण गर्दै मुख्यमन्त्री जमरकट्टेलले आफू टुक्रे योजनाको पक्षमा नभएको भन्दै मझौला र ठुला योजनामा सरकारको प्राथमिकता रहने प्रष्ट पारे । भक्तपुरको मध्यपुर थिमीबासी नै भएकोले हरेक क्षेत्रमा सहयोग गर्न तत्पर रहेको समेत मुख्यमन्त्री जमरकट्टेलले जानकारी गराए । थिमी ससुरालीघर भएका जमरकट्टेल काठमाडौं आउदा यहीँ बस्ने गर्दछन । उनले आफूले प्रमुख राजनीतिक सल्लाहकार पनि भक्तपुरका नेता डिपी ढकाललाई नियुक्त गरेको भन्दै भक्तपुरलाई बागमती प्रदेश सरकारको सदैव साथ् र सहयोग प्राप्त हुने बताए ।
उक्त अवसरमा मुख्यमन्त्री जमरकट्टेलले व्यक्तिगत अनुदानको दुरुपयोग बढेकाले समुदायमा आधारित अनुदान शुरु गर्ने उद्घोष गरे । उनले प्रदेश सभा सदस्य, स्थानीय सरकार र पार्टीको सुझाव अनुसार कार्ययोजना बनाउने समेत बताए । मुख्य मन्त्री जमरकट्टेलले आफू नेतृत्वको सरकारले नेपाल भाषा र तामाङ्ग भाषालाई सरकारी कामकाजको भाषा बनाउने निर्णय गरेको समेत जानकारी गराएका छन् । संघीयताको मर्म अनुसार जनता केन्द्रीत नीति तथा कार्यक्रम र योजना निर्माण एवं कार्यान्वयनमा सबैको लागि बागमती प्रदेश सरकारले काम गर्ने उनले प्रतिवद्धता प्रकट गरेका थिए ।
उक्त अवसरमा नेकपा(माओवादी केन्द्र) को मध्यपुर थिमी नगर समितिले भक्तपुर बाट प्रदेश सभा सदस्य भएका नेताद्वय देवेन्द्र श्रेष्ठ दिवाकर र भुवनकेशरी श्रेष्ठ भावना त्यसैगरी बागमती प्रदेशका मुख्य मन्त्री शालिकराम जमरकट्टेलका मुख्य राजनीतिक सल्लाहकार डिपी ढकाललाई बधाई तथा सम्मान व्यक्त गरिएको थियो । पार्टीको नगर अध्यक्ष एवं मध्यपुर थिमीका उपमेयर विजय कृष्ण श्रेष्ठको अध्यक्षतामा सम्पन्न कार्यक्रममा प्रमुख अतिथि पार्टीका जिल्ला इन्चार्ज दिलिप प्रजापति भिष्म रहेका थिए ।