भक्तपुर, १४ फागुन २०७९ भक्तपुर नगरपालिकाका प्रमुख सुनिल प्रजापतिले जेष्ठ नागरिकलाई सरकारले दिंदै आएको बृद्ध भत्ताप्रति असन्तुष्टि व्यक्त गरेका छन् । हुनेखानेलाई समेत बृद्ध भत्ता बाडेर राज्यले व्ययभार मात्र बढाइरहेको उनको भनाइ छ ।
शनिवार भनपा १ नपलीस्थित सहारा हेरचाह केन्द्रको १२ औं वार्षिकोत्सवको अवसरमा आयोजित कार्यक्रममा प्रमुख अतिथि रहेका नगर प्रमुख प्रजापतिले बिपन्न र सम्पन्नलाई राज्यले एकै नजरले हेर्न नहुने बताए । सम्पन्नसंग लिने र बिपन्नलाई दिने व्यवस्था समाजवादमा हुने भन्दै नेमकिपाका केन्द्रीय सदस्य समेत रहेका नगर प्रमुख प्रजापतिले पूजीवादी व्यवस्थामा समाजवादको नक्कल गरिएपनि व्यवहारिक् त्रुटी रहने प्रष्ट पारे । बृद्ध भत्ता बाड्नु भन्दा त्यो रकमले स्वास्थ्य, आवास र हेरचाह लगायतका क्षेत्रमा राज्यले जेष्ठ नागरिकको हितका धेरै दीर्घकालीन काम गर्न सकिने उनको दावी छ ।
भक्तपुर नगरपालिकाले जेष्ठ नागरिकका लागि लागि घरमै गएर नर्सिङ्ग सेवा उपलब्ध गराइरहेको उनको भनाइ छ । उनीहरुका लागि सुविधासम्पन्न छुट्टै घरको अवधारणा अन्तर्गत आदर निकेतन बनाइरहेको बताउदै उनले निर्माण सम्पन्न हुनासाथ जेष्ठ नागरिकलाई त्यहाँ राख्न शुरु गर्ने जानकारी गराए । प्रमुख प्रजापतिले नगरपालिकाले गरिब र आवश्यक ठानेका जेष्ठ नागरिकलाई आदर निकेतनमा निशुल्क राख्ने तर जेष्ठ नागरिकलाई बोझ सम्झी बुझाउन ल्याउने परिवारलाई दण्ड सजाय दिने समेत खुलासा गरे । उनले जेष्ठ सदस्यप्रति आदर, सम्मान र स्नेह हुनुपर्ने बताउदै आफू पनि बुढो हुनुपर्ने कुरा कसैले पनि बिर्सन नहुनेमा जोड दिए ।
पछिल्लो समय नगरमा पढ्न र कमाउने निहु बनाइ विदेश जाने र उतै पलायन हुने प्रवित्ति बढेको प्रति चिन्ता व्यक्त गर्दै प्रमुख प्रजापतिले स्वदेशमै पढ्न र उद्यम गर्न नगरपालिकाले ऋण समेत दिएर विदेश जाने क्रम रोक्न पहल गरिरहेको प्रष्ट पारे । पैसा साधन मात्र भएको र परिवार भन्दा ठुलो नभएको उल्लेख गर्दै उनले परिवार, समाज र देश बिर्सेर पैसाको पछि लाग्ने मानिसका कारण उनीहरु माथि परिवार र राज्यले गरेको लगानी खेर गएको जिकिर गरे । विदेशबाट छोराछोरीले पठाएको पैसा नभई उनीहरुको प्रेम जेष्ठ नागरिकलाई आवश्यक भएको भन्दै उनले सचेत नागरिकले पैसालाई भन्दा प्रेमलाई महत्व दिनुपर्नेमा जोड दिए ।