फलफूल, तरकारी र खाद्यजन्य वस्तुको विषादी परीक्षण सम्बन्धि प्रस्ताव मन्त्रिपरिषदले रोकेको भन्ने समाचारप्रति कृषि तथा पशुपन्छी विकास मन्त्रालयले ध्यानाकर्षण भएको जनाएको छ। मन्त्रालयले बुधबार एक विज्ञप्ति जारी गर्दै उक्त समाचार झुटो भन्दै खण्डन गरेको हो।

खाद्य पदार्थको गुणस्तर सम्बन्धमा बनेको खाद्य ऐन, २०२३ मा व्यवस्था भए अनुरूप नेपालभर उत्पादन, आयात, निर्यात एवम् बिक्री वितरण हुने खाद्य पदार्थका लागि मापदण्डलाई आकर्षित गर्ने काम भइरहेको विज्ञप्तिमा उल्लेख छ।

विज्ञप्तिमा भनिएको छ : ‘सो प्रस्ताव कुनै मुलुकको उत्पादनतर्फ लक्षित नभइ WTO को प्रावधान अनुरुप खाद्य ऐन, २०२३ मा व्यवस्था भए अनुरुप खाद्य ऐन, २०२३ बमोजिम नेपालभर उत्पादन, आयात निर्यात एवं बिक्री वितरण हुने खाद्य पदार्थका लागि सो मापदण्ड आकर्षित हुने व्यहोरा अनुरोध छ।’

प्रधानमन्त्री पुष्पकमल दाहाल ‘प्रचण्ड’ले तरकारी किसान र विषादीको विषयमा ध्यानाकर्षण भएको भन्दै नयाँ प्रस्ताव तयार गरेर मन्त्रिपरिषद्मा पेस गर्न निर्देशन दिइसक्नु भएको छ। प्रधानमन्त्रीको निर्देशन अनुसार मन्त्रालयले नयाँ प्रस्ताव तयार गरिरहेको विज्ञप्तिमा उल्लेख छ।