भक्तपुर, ८ फागुन २०७९भक्तपुर १ सल्लाघारीस्थित अक्सफोर्ड प्राक्टिकल स्कुलले विद्यार्थी मार्ग निर्देशन, प्रतिभा पहिचान तथा पुरस्कार वितरण कार्यक्रम सम्पन्न गरेको छ । विद्यालयका व्यवस्थापक राम दुवालको सभापतित्वमा कार्यक्रम सम्पन्न भएको हो ।
उक्त अवसरमा प्रमुख अतिथि सगरमाथा आरोही प्रकाशराज पाण्डेले विद्यार्थीलाई आत्मविश्वास, सहकार्य र निर्देशनको पालना सम्बन्धी अभिमुखीकरण गरेका थिए । विद्यार्थीको शैक्षिक सफलता र व्यक्तित्व विकास एवं प्रतिभा पहिचान गर्न प्रतियोगितात्मक तरिकाले जीवनोपयोगी ज्ञान, सिप र धारणा विकास गराउन किताब र कक्षाकोठामा पढाउने भन्दा रमाईलो र सहज वतावरणमा भौतिक प्रतिभा प्रस्फुटन, रचनात्मक कार्य सँगै सृजनात्मक सोच र चिन्तन गर्नुपर्ने कुरामा जोड दिदै पाण्डेले आत्मविश्वास, सहकार्य र सकारात्मक सोच बाट सफलता प्राप्त हुने प्रष्ट पारे ।
उनले सफलता हासिल गर्न आत्मविश्वास, सहकार्य र सही तवरले निर्देशनको पालना गर्नुपर्नेमा जोड दिए । जीवनको प्रत्येक घडीमा प्रयास, मेहेनत र अभ्यासलाई निरन्तरता दिनको लागि कक्षा ११ र एस.ई.ई मा सहभागी हुने विद्यार्थीहरुलाई उनले मार्ग निर्देशन समेत गरेका छन् ।
रीस र आवेग विद्यार्थीका सत्रु भएको भन्दै उनले जीवनको चुनौती र समस्या नै सफलताको पहिलो अवसर भएको बताए । यसलाई सही समय र परिवेशमा प्रयोग गर्न सके सफलता प्राप्त हुने बिश्वास दिलाउदै उनले आफ्नो सफल सगरमाथा आरोहणको वृत्तचित्र समेत प्रस्तुत गरेका थिए ।
कार्यक्रममा प्रधानाध्यापक रवि दुवालले विद्यार्थीहरुको अन्तर्निहित क्षमता र प्रतिभा प्रस्फुटन गराउन यस्ताखाले कार्यक्रम आयोजना गरिएको भन्दै विद्यालयले विद्यार्थीलाई किताबी किरो मात्र नबनाइ सक्षम र सवल नागरिक वनाउने लक्ष लिएको बताए ।
उक्त अवसरमा शिक्षक जीवन सुवालले प्रतिस्पर्धात्मक समाजमा विद्यार्थीहरुले हरेक क्षेत्रको बारेमा ज्ञान लिनुपर्ने र आफ्नो भविष्यको गन्तव्य पहिचान गर्न सक्नुपर्नेमा जोड दिएका थिए । कार्यक्रममा हाजिरी जवाफ, टेबुल टेनिस, हिज्जे प्रतियोगिताका विजयी विद्यार्थीहरुलाई पुरस्कृत समेत गरिएको संयोजक निराजन सिलवालले जानकारी गराए ।
उक्त अवसरमा विद्यार्थीहरुले नृत्य, गायन र कविता वाचन समेत गरेका थिए ।