भक्तपुर, १५ चैत २०७९बागमती प्रदेशका आन्तरिक मामिला तथा कानुन मन्त्री गंगानारायण श्रेष्ठले प्रदेश सरकार प्रवक्ताको जिम्मेवारी पाएका छन् । बुधबार बसेको प्रदेश मन्त्रीपरिषद्को बैठकले श्रेष्ठलाई प्रवक्ताको जिम्मेवारी दिएको हो ।
गत माघ ११ गते प्रदेशका मुख्यमन्त्री शालिकराम जम्कट्टेलले श्रेष्ठलाई मन्त्री नियुक्त गरेका थिए । प्रदेश सरकारका प्रवक्ता श्रेष्ठ सिन्धुलीबाट निर्वाचित प्रदेश सभा सदस्य हुन् । नेकपा (माओवादी केन्द्र) को चुनाव चिह्नबाट निर्वाचित भएपनि उनी डा बाबुराम भट्टराई नेतृत्वको नेपाल समाजवादी पार्टीका नेता हुन् । डा बाबुराम भट्टराई प्रधानमन्त्री हुँदा श्रेष्ठ उनका प्रमुख स्वकीय सचिव रहेका थिए ।
सिन्धुली स्थायी घर भएका श्रेष्ठ भक्तपुरका अस्थायी बासिन्दा हुन् । उनी मन्त्री हुनु अघि सूनपा-५ सुवर्ण चोकमा बस्दै आएका थिए ।
यसअघि प्रवक्ता रहेका मन्त्री जगन्नाथ थपलिया उनको पार्टी नेकपा(एमाले) संगै सरकारबाट बाहिरिएपछि प्रवक्ताको पद रिक्त रहेको थियो । बुधवार बसेको मन्त्रिपरिषद् बैठकले मन्त्री श्रेष्ठलाई प्रवक्ताको जिम्मेवारी दिने निर्णय गरेको मुख्यमन्त्रीका प्रमुख राजनीतिक सल्लाहकार डिपी ढकालले जानकारी गराएका हुन् । वागमती प्रदेश सरकारको मन्त्रीपरिषदको बैठकले यसै आर्थिक बर्षभित्र कार्यान्वयन गर्ने गरि ७ हजार ५ सय जनालाइ स्वरोजगार बनाउने गरि तालिम र टेवा पुजी प्रदान गर्ने कार्यबिधी पनि पारित गरेको उनको भनाइ छ ।