भक्तपुर, १७ चैत २०७९भक्तपुरका विभिन्न ठाउँबाट घरको गोठमा बाँधिएका खसीबोका चोरीएको गुनासोले गर्दा सक्रिय प्रहरीले चोरीमा संलग्न दुई जनासहित मासु पसल सञ्चालकलाई समेत पक्राउ गर्न सफल भएको छ ।
बा २ ज ४३२७ नम्बरको ट्याक्सीमा राखेर बिक्री गर्न लैजाँदै गरेको बोका चोरीको भएको आशंकामा प्रहरीले अनुसन्धान गरेपछि ट्याक्सी चालक रामेछाप दोरम्बा–१ घर भई हाल सूर्यविनायक बस्ने २४ वर्षीय सुमन तामाङ र रामेछाप दोरम्बा–७ घर भई हाल मध्यपुरथिमि बस्ने ४० वर्षीय मिलन तामाङ पक्राउ परेका जिल्ला प्रहरी परिसर भक्तपुरका डिएसपी बसन्त पाठकले बताए ।
चोरीका खसीबोका खरिद गरी मासु बिक्री गर्ने गरेको आरोपमा रामेछाप मन्थली नगरपालिका–५ सुनारपानी घर भई हाल काठमाडौँको पेप्सीकोलामा रामेछाप उदयपुर मासु पसल सञ्चालन गर्ने ४३ वर्षीय दिलबहादुर कार्कीलाई पनि पक्राउ परेका बताइएको छ ।
शुक्रवार बिहान करिब ३ बजे ट्याक्सीमा बोका राखी ल्याएको देखेपछि जगाती वृत्तले अनुसन्धान गरेको थियो । काभ्रे र भक्तपुरमा खसीबोका चोरी भएको दर्जन बढी केस दर्ता भएपछि प्रहरी चनाखो भएको हो ।