भक्तपुर, २८ चैत्र २०७९ भक्तपुरमा आज बिहान नौ बजे भैरवनाथको रथ ग: हिटी पुर्याइएको छ । जात्राको सुरुवात गरी सोमबार तमारीबाट तानेर दत्तात्रय पुगेको रथ फर्काउन नसके पछि आज बिहान ग: हिटी पुर्याइएको हो ।
रथलाई राति नै गःहिटी ल्याउनुपर्नेमा ढुङ्गा हानाहान भएपछि मानिसहरु बिथोलिएकाले दत्तात्रयमै राख्नु परेको भक्तपुर प्रहरी परिसरका प्रहरी उपरीक्षक प्रजित केसीले बताएका छन् । आज बिहान स्थानीयवासीको सहायतामा रथ तानेर गःहिटीमा राखिएको प्रहरी उपरीक्षक केसीले जानकारी दिएका हुन् । उनले भने, “राति ढुङ्गा हानाहान भएपछि रथलाई गःहिटी ल्याउन सकिएन, त्यसैले आज स्थानीयवासीलाई आग्रह गरिएको थियो र उनीहरूले नै रथ तानेर गःहिटी पुर्याएका छन् ।”
जात्रामा भैरवनाथको रथ तान्ने क्रममा मध्यराति दत्तात्रयमा पुगेपछि करिब १ बजेदेखि ४ बिहान ४ बजे सम्म ढुङ्गा हानाहान भएको भक्तपुर प्रहरी परिसरका प्रहरी उपरीक्षक प्रजित केसीले जानकारी दिए । उनले बिहान ४ बजेसम्म ढुङ्गा हानाहान हुँदा २३ जना घाइते भएको बताए । घाइते सबैको उपचार गरी राति नै घर फर्काइएको र कसैको पनि अवस्था जटिल नरहेको उनको भनाइ छ ।
प्रहरी उपरीक्षक प्रजित केसीका अनुसार ढुङ्गा हानाहान गर्ने दस जनालाई प्रहरीले राति नै पक्राउ गरेको छ । उनले भने, “जात्रामा ढुङ्गा हानाहान गर्ने दस जनालाई प्रहरीले राति नै ढुङ्गा हान्दै गर्दा पक्राउ गरेको र सिसी क्यामरा तथा अरू माध्यमबाट थप ढुङ्गा हान्नेहरू पहिचान गरी पक्राउ गर्नेछौँ । पक्राउ परेकालाई प्रचलित कानुन बमोजिम कारबाही गर्छौ ।”
प्रमुख जिल्ला अधिकारी खगेन्द्रप्रसाद रिजालले बिस्केट जात्रा स्थानीयवासीको ऐतिहासिक र मौलिक जात्रा भएकाले जात्रामा सुरक्षाकर्मीले हस्तक्षेप नगरेको तर ढुङ्गा हान्ने क्रम नरोकिएपछि प्रहरीले पक्राउ गरेको बताएका छन् । उनले मानवीय क्षति नभएको जानकारी दिँदै जात्रा अवधिभर शान्ति सुव्यवस्था कायम गराउन थप सुरक्षा रणनीति अपनाउने जानकारी दिए ।
आठ रात र नौ दिनसम्म भव्यरूपमा बिस्काः जात्रा मनाइने गर्दछ ।