प्रेस सेन्टर नेपाल, चाँगुनारायण नगरपालिका शाखाको कार्यसमिति पुनर्गठन गरिएको छ । आकाश गजुरेलको अध्यक्षतामा नयाँ कार्यसमिति गठन गरिएको हो ।

कमलबिनायकमा सम्पन्न नगर भेलाले गजुरेलको अध्यक्षतामा ५ सदस्यीय कार्यसमिति गठन गरेको सचिव कीर्ति खड्काले जानकारी गराइन । निवर्तमान अध्यक्ष भवनाथ गेलालको ब्यस्तताको कारण कार्यसमिति पुनर्गठन गरिएको जिल्ला सचिव मदन ढुङ्गानाले पुष्टि गरेका छन् ।

उक्त अवसरमा नेकपा(माओवादी केन्द्र) का नगर अध्यक्ष नरेश खड्काले पार्टीको शुभेच्छुक संगठन हुनुको नाताले प्रेस सेन्टरले पार्टीलाई जनताबीच स्थापित गर्न प्रचारको मोर्चा सम्हाल्नुपर्ने बताए । चाँगुनारायणका जनताका समस्या समाधान गर्न समेत प्रेस सेन्टरमा आवद्ध पत्रकारले रचनात्मक भूमिका खेल्नुपर्ने उनको भनाइ छ ।

त्यसैगरी प्रेस सेन्टर नेपाल, जिल्ला समन्वय समिति भक्तपुरका अध्यक्ष संजीप घिमिरे ‘शुभचिन्तक’ले महान सहिद कृष्णसेन इच्छुक लगायतले देखाएको जनपक्षीय पत्रकारिताको बाटोमा प्रेस सेन्टरका पत्रकारहरु हिड्नुपर्ने प्रष्ट पारे । जनताको शासन र जनताको पक्षमा भएका परिवर्तनको बिरुद्ध लाग्नेहरुको प्रतिरोध गर्न जनताका पत्रकार बैचारिक सेना भएर उभिनुपर्ने बताउदै उनले परिवर्तनलाई संस्थागत गर्दै बिकास, समृद्धि र सुशासनका लागि लामबद्ध बन्न प्रेरित गरेका थिए ।

उक्त अवसरमा प्रेस सेन्टर नेपालका उपत्यका प्रदेश सचिव भिमराज खड्का, जिल्ला समन्वय समिति भक्तपुरका उपाध्यक्ष बाबुकाजी साछें श्रेष्ठ, सचिव मदन ढुङ्गाना, सहसचिव प्रदिप श्रेष्ठ र चाँगुनारायण नगर शाखाका निवर्तमान अध्यक्ष भवनाथ गेलालको समेत उपस्थिति रहेको थियो ।