भक्तपुर नगरपालिकाले आमाबुवा गुमाएका बालबालिकाहरुलाई शैक्षिक सामग्री वितरण गरेको छ । नगरपालिकाले एक कार्यक्रम गरी नगरभित्रका विद्यालयमा अध्ययनरत टुहुरा बालबालिकालाई शैक्षिक सामाग्री वितरण गरेको हो ।

उपप्रमुख रजनी जोशीले भक्तपुर नगरपालिकाले शिक्षा र स्वास्थ्य क्षेत्रलाई मूख्य प्राथमिकतामा राखेको बताउदै आमाबुबाविहीन बालबालिकाहरुलाई शैक्षिक सामग्री वितरण गर्ने कार्यलाई निरन्तरता दिइएको जानकारी गराइन । यस्ता बालबालिकालाई अनाथ महसुस हुन नदिन विद्यालयले उपयुक्त वातावरण बनाउनुपर्ने र शिक्षकशिक्षिकाहरुले मातृत्व र पितृत्व सहितको माया ममता दिनुपर्नेमा उनले जोड दिइन ।

कार्यक्रममा बागीश्वरी मावि, सैनिक आवसीय मावि, शान्तिनिकेतन मावि, गणेश मावि, समाज सुधार आवि, भीम आदर्श आवि, बालमन्दिर आवि, बालसेवक आवि, सन्तति आवि र मिनर्वा ई. स्कूलका गरी कूल ५१ जना आमाबुबा गुमाएका बालबालिकाहरुलाई शैक्षिक सामग्री हस्तान्तरण गरिएको नगरपालिकाले जनाएको छ ।

कार्यक्रममा वडा नम्बर ९ का वडाध्यक्ष रविन्द्र ज्याख्व, वडा नम्बर ७ का वडाध्यक्ष उकेश कवां, नगरको समाज कल्याण समितिकी संयोजक रोशनमैंया सुवाल लगायतले आमाबाबु गुमाएका बालबालिकालाई शैक्षिक सामग्री वितरण गर्दा उनीहरुलाई पढाईमा हौसला र उत्साह प्राप्त हुने विश्वास व्यक्त गरे ।