भक्तपुर, २४ बैशाख २०८०अमेरिका लगायतका देशहरूमा पठाइदिन्छु भन्दै रकम ठगी गरेको अभियोगमा भक्तपुरबाट एक ब्यक्ति पक्राउ परेका छन् । चाँगुनारायण नगरपालिका-६ तेलकोट, नगरकोट बस्ने ६८ वर्षीय सिताराम बास्तोला पक्राउ परेका हुन् ।
आइतबार दिउँसो बास्तोलालाई पक्राउ गरिएको प्रहरीले पुष्टि गरेको हो । बास्तोला समेतले मिली १ सय जनालाई वैदेशिक रोजगारका लागि अमेरिका, जर्मनी, बेलायत तथा जापान लगायतका देशहरूमा पठाइदिने प्रलोभन दिई ठगी गरेको आरोप छ । बिदेशका प्रतिष्ठित कम्पनीहरूमा ४ लाख रूपैयाँ बढी तलबमा काम लगाइने भन्दै प्रलोभनमा पारी पीडितहरुबाट पटकपटक गरी ३ करोड ५६ लाख ८ हजार रुपैयाँ ठगी गरेकोले पक्राउ गरी उपस्थित गराउन वैदेशिक रोजगार बिभागबाट प्रहरीलाई पत्राचार गरिएको थियो ।
काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले नगरकोटको बास्तोलालाई भक्तपुरको भक्तपुरको दरबारस्क्वायरबाट पक्राउ गरेको हो । उनलाई थप अनुसन्धान तथा कारवाहीको लागि वैदेशिक रोजगार विभाग बुद्धनगर काठमाडौं पठाइएको प्रहरीले जनाएको छ ।