भक्तपुर, २९ बैशाख २०८०भक्तपुर अस्पतालकी मेडिकल सुपरिण्टेण्डेण्ट डा सुमित्रा गौतमले स्वास्थ्य परिचारिका अर्थात नर्स जस्तै बिरामी प्रतिको सेवा भाव अस्पतालका सबै कर्मचारीमा हुनुपर्ने बताएकी छन् । अस्पतालमा नर्सको भूमिका परिवारको आमा जस्तो भएको उल्लेख गर्दै डा गौतमले नर्स बाट सबैले सेवाभाव सिक्नुपर्ने बताएकी हुन् ।
Sumitra Gautam Bhaktapur Hospital
महान् फ्लोरेन्स नाइटिङ्गेलको जन्म दिन अर्थात अन्तराष्ट्रिय नर्स दिवसको अवसरमा शुक्रवार भक्तपुर अस्पतालंमा आयोजित सभालाई सम्बोधन गर्दै डा गौतमले नर्सहरुले पनि नाइटिङ्गेलको आदर्श पालना गरी पेशालाई थप उचाइमा पुर्याउन योगदान गर्नुपर्ने प्रष्ट पारिन् । आफ्नो व्यक्तिगत अथवा कामको तनाव बिरामीलाई प्रदर्शन गर्नु नहुनेमा जोड दिंदै उनले नर्सको सेवा र मुस्कानले नै आधा रोग सन्चो हुने हुँदा बिरामीलाई आफ्नै घरको सदस्य लाई जस्तै गरी सेवा प्रदान गर्न उनले आग्रह गरिन् ।
अस्पतालले नर्सलाई सेवा वापत सुविधा दिन कुनै कन्जुस्याई नगर्ने जिकिर गर्दै मेसु डा गौतमले नर्स पेशालाई पहिले सेवा त्यसपछि मात्र जागिरको रुपमा बुझ्नुपर्नेमा जोड दिएकी छन् ।
उक्त अवसरमा नेपाल नर्सिङ्ग संघका केन्द्रीय सदस्य हरिप्रसाद कोजूले बिरामीको सेवामा तल्लीन नर्सका पिडा सरकारले सुनुवाई गर्न नसकेको दुखेसो पोखे । आधारभूत सेवा सुविधा समेत सबै नर्सले प्राप्त गर्न नसकेको भन्दै उनले मन्त्रीहरुलाई समस्या सुनाउदा सुनाउदै हैरान भएको बताए ।
वरिष्ठ नर्सिङ्ग अधिकृत सजना साखको अध्यक्षतामा सम्पन्न कार्यक्रममा रोशनी श्रेष्ठले अस्पतालमा नर्सको अवस्था बारे अवगत गराइन । कार्यक्रममा केक काटिएको थियो भने नर्सहरुले एक आपसमा शुभकामना साटासाट गरेका थिए ।
