भक्तपुरको देकोचाबाट चाँगुनारायण जाने बाटो १२ मिटर चौडा हुने भएको छ । आइतवार बागमती प्रदेश सरकारका भौतिक पूर्वाधार बिकास मन्त्री युवराज दुलालले उक्त सडक स्तरोन्नती कार्यको शिल्यान्यास गरेका हुन् ।

सडक स्तरोन्नती कार्यको शिल्यान्यास गर्दै मन्त्री दुलालले सरकारले राजनीतिक आस्थाका आधारमा नभई जनताको आवश्यकताका आधारमा बजेट बिनियोजन गर्ने बताए । नेकपा(माओवादी केन्द्र) का केन्द्रीय सदस्य समेत रहेका उनले भने, ”मन्त्री जुनसुकै पार्टीका भएपनि फरक पर्दैन, बजेट सरकारले ल्याउने हो र सरकार सबै जनताको हो ।”

चाँगुनारायण क्षेत्रबाट निर्वाचित भएर भौतिक पूर्वाधार मन्त्री बनेका कृष्णलाल भडेलले ५ करोड बजेट बिनियोजन गरेको सडकमा आफू मन्त्री भएपछि बढाएर ५९ करोड पुर्याएको खुलासा गर्दै मन्त्री दुलालले प्रदेश सरकार भक्तपुर जिल्लाकै समग्र बिकासको पक्षमा रहेको बताए । उनले यो सडक मध्यपहाडी लोकमार्ग हुँदै भक्तपुर भित्रिने बैकल्पिक बाटो हुने बताउदै यसले काभ्रे, दोलखा र रामेछापको दुरी घटाउने समेत जिकिर गरेका छन् ।

भक्तपुर संघीय राजधानीसँग जोडिएर पनि भौतिक पूर्वाधारमा पछि पारिएको प्रति उनले चिन्ता व्यक्त गरेका छन् । मन्त्री दुलालले प्रदेश सरकारले भक्तपुरलाई आधुनिक सुविधाले सम्पन्न पार्दै काठमाडौंका मानिसलाई भक्तपुरमा बस्न पाए हुने भन्ने वातावरण बनाउने योजना बारे अवगत गराएका थिए ।

बिकासका योजना पर्दा पहलको जस लिने भन्दा पनि योजनालाई समयमै सम्पन्न गर्न सामूहिक सहकार्य हुनुपर्नेमा उनको जोड रहेको छ । ”परिसकेको योजनामा जस लिने भन्दा पनि योजना माग गर्दा साझा रुपमा माग गर्ने एवं साझा अपनत्व लिदै काम गर्न र समयमै सम्पन्न गर्न सामूहिक सहकार्य गर्ने परिपाटी बसाल्नुपर्दछ ।” मन्त्री दुलालले भने । उनले प्रादेशिक सडक गुरुयोजना अनुसार प्रदेश सरकारले काम गर्ने जिकिर गर्दै भक्तपुरमा दर्जनौं सडक बनाउन प्रदेश सरकार प्रतिवद्ध रहेको बताएका छन् । ” भनिएका मात्र होइन, नभनिएका यहाँका सडकको निर्माण एवं स्तरोन्नतीको जिम्मा पनि प्रदेश सरकारले लिन्छ ।” उनले भने ।

सडक शिलान्यास कार्यक्रममा भक्तपुर नगरपालिकाका वडाध्यक्ष हरिराम सुवाल र चाँगुनारायणका वडाध्यक्ष जयन्द्र खड्काले सडक निर्माणका क्रममा सिमाङ्कन लगायतका समस्या समाधानमा आफूहरुको पूर्ण साथ् हुने प्रतिवद्धता प्रकट गरेका थिए भने चाँगुनारायणका नगर प्रमुख जीवन खत्रीले संघ र प्रदेश सरकारसंग समन्वय गरी थप बिकासका योजनाहरु नगरपालिकामा भित्राउन प्रयास भैरहेका र छिट्टै यो नगर भौतिक पूर्वाधारले भरिपूर्ण हुने बिश्वास व्यक्त गरे ।

उक्त अवसरमा नेकपा(माओवादी केन्द्र) का नेता एवं बागमती प्रदेश सभा सदस्यद्वय देवेन्द्र श्रेष्ठ दिवाकर र भुवनकेशरी श्रेष्ठ भावना त्यसैगरी नेपाली काँग्रेसका नेता एवं पूर्व मन्त्री कृष्णलाल भडेल, जिसस प्रमुख ईश्वरबहादुर थापा लगायतको आतिथ्यता रहेको थियो ।

यस्तो छ सडकको काम
सडक १२ मिटर चौडा गर्नेगरी निर्माणकम्पनीले ठेक्का स्वीकार गरी काम शुरु गरेको छ । साढे ८ किमीका लागि ठेक्का लागेको यो सडकमा ठेकेदार कम्पनीले ५ किलोमिटर मात्र कालोपत्रे गर्ने भौतिक पूर्वाधार कार्यालय काभ्रेका प्रमुख भरत यादवले जनाएका छन् । कम्पनीले सडक चौडा, डामर कंक्रीट, रिटेनिङ वाल, सवर लाइन र प्लम ड्रेन लगायतका काम गर्ने बताइएको छ ।

५ करोडबाट ५९ करोड बिनियोजन
यो सडकको लागि यस क्षेत्रका यस अघि सांसद समेत रहेका बागमती प्रदेश सरकारका तत्कालिन भौतिक पूर्वाधार मन्त्री कृष्णलाल भडेलले ५ करोड बिनियोजन गरेका थिए । सरकार परिवर्तन संगै बजेट काटिने चिन्ताले स्थानीय ब्याकुल बनेका थिए । संयोगबस अहिले बागमती प्रदेश सरकारको मुख्यमन्त्रीको प्रमुख राजनीतिक सल्लाहकारको जिम्मेवारी सह्हाल्न पुगेका डिपी ढकाल पनि यसै क्षेत्रका नेता भएकाले स्थानीयले बजेट निरन्तरताको माग गरे । सत्तारुढ दलका सांसद देवेन्द्र श्रेष्ठ, भुवनकेशरी श्रेष्ठ र सुरेश श्रेष्ठले समेत यसमा पहल गरे ।

जनप्रतिनिधिको आग्रह र पूर्वाधार बिकास कार्यालय काभ्रेको सिफारिसमा भौतिक पूर्वाधार बिकास मन्त्री युवराज दुलालले बजेट ५ करोडलाई बढाएर ५९ करोड बिनियोजन गरिदिए । आइतवार सडक शिलान्यास गर्दै मन्त्री स्वयम्ले सोकुरा खुलासा गरेका हुन् । उनले यस सडकलाई काभ्रे,दोलखा, रामेछाप लगायत मध्य पहाडलाई जोड्ने बैकल्पिक प्रादेशिक मार्ग बनाउने प्रदेश सरकारको योजना बमोजिम रकम बढाएको खुलासा गरेका छन् । सरकार परिवर्तन संगै बजेट काटिने हल्ला भएपछि  आफूहरूले चासो राखेको र बजेट वृद्धि गराउन पहल गरेको नेकपा(माओवादी केन्द्र) का जिल्ला संयोजक सुनिल बासुले बताए ।

३९ करोड ५५ लाख रुपैयाँको लागत
देकोचा चाँगु न्याचोपौवा मंगलटार साँखु सलम्बुटार सडक नामाकरण गरिएको सडक स्तरोन्नती आयोजना ३९ करोड ५५ लाख रुपैयाँमा निर्माण कम्पनीले ठेक्कामा लिएको छ ।

बागमती प्रदेश सरकारको धुलिखेलस्थित भौतिक पूर्वाधार कार्यालयले यसको स्तरोन्नती कार्यका लागि ठेकेदार कम्पनी देव एण्ड सायर/ज्ञानज्योति/क्षितिज जेभी कोटेश्वर संग निर्माण सम्झौता गरेसंगै आइतवार बाट काम शुरु भएको छ । ५९ करोड बजेट बिनियोजन भएको यो आयोजनामा घटाघट गरी उक्त संयुक्त कम्पनीले ३९ करोड ५५ लाख रुपैयाँको लागतमा काम सक्नेगरी ठेक्का स्वीकार गरेको हो ।

२ वर्ष भित्र निर्माण सम्पन्न गरिने
करिब साढे ८ किमि लम्बाई रहेको यस सडकको निर्माण २ वर्ष भित्र सम्पन्न गर्नेगरी निर्माण कम्पनीले ठेक्का लिएको छ । गत बैशाख ३१ गते निर्माण सम्झौता भएको सडक २०८२ बैशाख ३० सम्म निर्माण सम्पन्न गरिसक्नुपर्ने भौतिक पूर्वाधार कार्यालय काभ्रेका लेखा प्रमुख श्रवन ढुंगानाले जनाएका छन् ।