भक्तपुर, २६ जेठ २०८०नागरिक राष्ट्रिय दैनिक र रिपब्लिकाको प्रकाशन संस्था नेपाल रिपब्लिक मिडिया लिमिटेडले सर्वसाधारणलाई आईपिओ बिक्री खुला गरेको छ । आज जेठ २६ गतेदेखि कम्पनीले आईपिओ बिक्री खुला गरेको हो ।
सर्वसाधारणका लागि ३५ लाख २५ हजार ९ सय ३० कित्ता शेयर निष्काशन गरेको कम्पनीले जनाएको छ । जेठ ३० गतेसम्म आवेदन दिन सकिने बताइएको छ । आवेदन दिंदा न्युनतम १० कित्ता र अधिकतम ५ सय कित्ताको लागि आवेदन दिनु पर्ने छ । यसका लागि मेगा क्यापिटल बिक्री प्रबन्धक रहेको छ ।
।
वैदेशिक रोजगारीमा रहेका नेपालीलाई ४ लाख ३५ हजार ३ सय कित्ता, कम्पनीका कर्मचारीलाई १ लाख ७४ हजार १ सय २० कित्ता शेयर, र सामुहिक लगानी कोष योजनाहरुलाई २ लाख १७ हजार ६ सय ५० कित्ता शेयर पनि कम्पनीले बाँडफाँड गरिसकेको छ ।
नेपाल धितोपत्र बोर्डले कम्पनीलाई वैशाख ११ गते आईपिओ निष्काशनको लागि अनुमति प्रदान गरेको थियो । बोर्डबाट अनुमति पाएसंगै कम्पनीले प्रति शेयर १ सय रुपैयाँको दरले कुल ४३ करोड ५३ लाख बराबरको ४३ लाख ५३ हजार कित्ता बराबरको शेयर निष्काशन गरेको हो । कम्पनीले आफ्नो जारी पुंजीको ४४.९९ प्रतिशत शेयर सर्वसाधारणलाई निष्काशन गरेको जनाएको छ ।
