भक्तपुर नगरपालिका वडा नम्बर १ स्थित अक्सफोर्ड प्राक्टिकल स्कूल/कलेजमा विद्यार्थीहरुलाई अभिमुखीकरण एवं मार्गनिर्देशन कार्यक्रम सम्पन्न भएको छ । यस वर्ष एस.ई.ई. परीक्षामा सहभागी विद्यार्थीहरुलाई लक्षित गरी सो कार्यक्रम सम्पन्न भएको हो ।

उक्त अवसरमा शिक्षण अरुको लागि र सिकाई आफ्नै लागि भएको भन्दै अक्सफोर्ड प्राक्टिकल स्कूलका अध्यक्ष राम दुवालले विद्यार्थीहरुको सुन्दर भविष्य उनीहरुको सुन्दर सपना र त्यसलाई प्राप्त गर्ने सही मार्गमा निर्भर रहने बताए । अथक मेहेनत, परिश्रम र चुनौतीहरुलाई सकारात्मक तवरले सामना गर्ने क्षमतावान् विद्यार्थीको सपना मात्र पुरा हुने कुरामा जोड दिंदै उनले सपना देख्न मात्र नभई पूरा गर्न पनि प्रेरित गरेका थिए ।

कार्यक्रममा जिल्ला प्याब्सनका अध्यक्ष तथा नवरत्न स्कूलका प्रिन्सिपल सुरेन्द्र श्रेष्ठले विद्यार्थीहरु विदेशका लागि नभई स्वदेशमै उच्च शिस्खा दिक्षा हासिल गरी देश, समाज र परिवारलाई साथ र सहयोग दिनुपर्नेमा जोड दिए । सफलताको शिखरमा चढ्नु भन्दा पहिले आवश्यक सम्पूर्ण तयारी पूरा गर्नुपर्ने प्रष्ट पार्दै उनले आफूले कुन विषय पढ्ने र कहाँ पढ्ने भन्ने विषयमा विद्यार्थीले सहि निर्णय लिन सुझाव दिए ।

सोहि कार्यक्रममा अक्सफोर्ड प्राक्टिकल स्कूलका +२ इन्चार्ज निराजन सिलवालले सिटिभिटीको प्राविधिक शिक्षाको कार्यक्रम तथा यसको विविध पक्षहरुको बारेमा प्रष्ट पारेका थिए । उनले प्राविधिक तथा व्यवसायिक सिपयुक्त शिक्षा तथा नैतिक एवं बैज्ञानिक सस्कारयुक्त ज्ञानको अभावमा जीवन अघि बढ्न नसक्ने बताए । आफ्नो योग्यता र क्षमताको विकास गरी सही गन्तब्यमा पुग्न नविनतम सोच, चिन्तन र विश्लेषणको आवश्यकता औल्याउदै उनले विद्यार्थीले आफूसंग भएको बिशिष्ठ क्षमता प्रष्फुटन गर्न \सक्नुपर्नेमा जोड दिंदै त्यसका लागि आवश्यक मार्गनिर्देश गरेका थिए ।

सोही कार्यक्रममा जीव विज्ञानमा उमेश काजी मानन्धर, भौतिक विज्ञानमा सचिन मानन्धर, इन्जिनियरीङ तर्फ सुजिन मानन्धर र व्यवस्थापन तर्फ राम प्रसाद मानन्धरले सम्बन्धित विषय वस्तु, क्षेत्र, महत्व बारेमा विद्यार्थीहरुलाई जानकारीका साथै अभिमुखिकरण गरेका थिए ।
कार्यक्रमका सहभागी श्री प्रज्जल मगरले भने- “हिजोसम्म कुन विषय र कहाँ पढ्ने निर्णय लिन सकिएको थिएन अव निर्णय लिन सजिलो भयो ।”

कार्यक्रममा आफना् भनाई राख्दै अक्सफोर्ड प्राक्टिकल स्कूलका प्रिन्सिपल रवि दुवालले विद्यार्थीहरुले अरुको लहैलहैमा नलागी रुचि, क्षमता र चाहना अनुसारको विषय लिई पढ्नुपर्नमा जोड दिए । ”कसैको दबाव र प्रभावका पछाडि लागेर विषय रोज्नु भनेको आफूलाई नै असफल बनाउनु हो ।” उनले भने ।

अक्सफोर्डमा +२ म्यानेजमेन्ट, कम्प्यूटर साइन्स, होटेल म्यानेजमेन्ट र मानविकीका विभिन्न विषयहरुको पढाइ हुने हुनाले विद्यार्थीको मनोविज्ञान आफूहरुले बुझ्दै आएको बताउदै उनले विद्यार्थीले विद्यालय, परिवार र देशले उनीहरुमाथि गरेको अपेक्षा बुझेर अध्ययन गरे विद्यार्थी मात्र मात्र नभई देशकै भविष्य उज्वल हुने दावी गरे ।

जिल्ला मानन्धर युवा संघको आयोजनामा सम्पन्न कार्यक्रमको सभापतित्व उत्तम मानन्धरले गरेका थिए भनेउक्त कार्यक्रममा संयोजक रामदेवी मानन्धर र न्हुछे रत्न मानन्धरले पनि विद्यार्थीले सहि बाटो पकड्न अपनाउनुपर्ने सावधानीबारे सुसूचित गरेका थिए ।