भक्तपुर, १३ असार २०८० भक्तपुरमा मुकुण्डो बनाउने तालिम शुरु भएको छ । बुधवारदेखि तालिम शुरु भएको हो ।
नेपाल हस्तकला महासंघको सहयोग र भक्तपुर हस्तकला संघको आयोजनामा बुधवार शुरु भएको तालिम १२ दिन सम्म चल्ने आयोजकले जनाएको छ । उक्त १२ दिने मुकुण्डो बनाउने तालिममा १५ जना प्रशिक्षार्थीहरू सहभागी रहेको छन् ।
तालिमलाई एक कार्यक्रमका बीच प्रमुख अतिथि नेपाल हस्तकला महासंघका केन्द्रीय सदस्य एवं भक्तपुर हस्तकला संघका निर्वतमान अध्यक्ष गणेशमान राजचलले उद्घाटन गरेका थिए । प्रमुख अतिथि राजचलले हरेक व्यक्तिलाई जीवनयापन गर्नको लागि कुनै न कुनै सिप सिक्नु अनिवार्य रहेकोमा जोड दिंदै सीप सिकेका व्यक्तिहरू भोकै मर्नु नपर्ने जिकिर गरे ।
भक्तपुर हस्तकला संघका अध्यक्ष शम्भु श्रेष्ठको सभापतित्वमा भएको कार्यक्रममा संघका कोषाध्यक्ष एवं प्रशिक्षक सागर चित्रकारले स्वागत मन्तब्य राखेका थिए भने संघका सचिव राजेन्द्र नापितले कार्यक्रम सञ्चालन गरेका थिए ।