भक्तपुर, १४ असार २०८०भक्तपुर । नेकपा एमालेका केन्द्रिय सदस्य एवं बागमती प्रदेश सरकारका पूर्वमन्त्री कैलाश ढुंगेलले वर्तमान सरकारका प्रधानमन्त्री पुष्पकमल दाहाल प्रचण्ड जसरी पनि सत्ता टिकाउने खेलमा लागेका बताएका छन् । सरकारका कामकारबाही सत्ता टिकाउन केन्द्रीत रहेको उनले आरोप लगाएका हुन् ।
एमालेका तत्कालीन महासचिव जननेता मदन भण्डारीको ७२ औं जन्मजयन्तीका अवसरमा पार्टी निकट नेपाल खेलकुद महासंघ भक्तपुर शाखाले विहिवार आयोजना गरेको वाकथुन कार्यक्रमलाई सम्बोधन गर्दै नेता ढुंगेलले सत्तापक्षले सबैतिर गठबन्धन गरेर एमालेलाई एक्ल्याउन खोजेको टिप्पणी गरे । “गाउँमा खानेपानी समितिदेखि माथीसम्म गठबन्धन गरेर एमालेलाई हराउने अभियान चलाइएको छ ।” उनले भने ।
आजपनि मदन भण्डारीले प्रतिपादन गरेको जनताको बहुदलीय जनवाद नै उत्कृष्ट सिद्धान्त भएको भन्दै उनले मदन भण्डारीको आदर्श र बिचारले माझिएका नेता कार्यकर्ता रहुन्जेल एमालेलाई सबै शक्ति मिलेपनि बिचलित बनाउन नसक्ने बताए ।
कार्यक्रममा एमाले जिल्ला कमिटीका अध्यक्ष बचन देउजाले भक्तपुर पार्टी जननेता मदन भण्डारीले देखाएको बाटोमा अघि बढ्ने बताए । उक्त अवसरमा जिल्ला कमिटीका सचिव मोहनवीर श्रेष्ठ, चाँगुनारायण नगरकमिटीका अध्यक्ष राम तिमल्सिना, मध्यपुरथिमिका सुर्यलाल श्रेष्ठ, भक्तपुरका अध्यक्ष मदन देउलालगायतको उपस्थिति रहेको थियो । नेपाल खेलकुद महासंघ भक्तपुरका अध्यक्ष अनन्त वैद्यको सभापतित्वमा कार्यक्रम सम्पन्न भएको थियो । कार्यक्रम अघि वाकथुन नपुखुबाट सुरु भएर सल्लाघारीहुदैं एमाले जिल्ला पार्टी कार्यालय सूर्यविनायक पुगेर सभामा परिणत भएको थियो ।