भक्तपुर, १६ असार २०८० भक्तपुरमा आफ्नै काकाको हत्या अभियोगमा एक व्यक्ति पक्राउ परेका छन् । भक्तपुर नगरपालिका-९ सूर्यमणी बस्ने ४१ वर्षीय न्हुछें प्रजापतिलाई प्रहरीले पक्राउ गरेको हो ।
न्हुछेंले कुटपिट गर्दा गम्भीर घाइते भएका ८१ वर्षीय उनका काका कृष्ण बहादुर प्रजापतिको सोही दिन उपचारको क्रममा पाटन अस्पतालमा मृत्यु भएपछि पक्राउ गरिएको प्रहरीले पुष्टि गरेको छ । कुटपिट पश्चात फरार रहेका नुछेलाई प्रहरी वृत्त जगातीबाट खटिएको प्रहरीले भक्तपुर नगरपालिका-७ महेश्वरी खेलमैदानबाट घटना भएको दिन बिहीवार नै पक्राउ गरेको जिल्ला प्रहरी वृत्त जगातीका डिएसपी राजकुमार श्रेष्ठले जानकारी दिएका छन् ।
सम्पत्तीको विषयमा बिबाद गरी ४१ वर्षीय न्हुछेंले सूर्यमढीस्थित घरमा हिडडुल समेत गर्न नसक्ने ८१ वर्षीय उनका आफ्नै काका कृष्ण बहादुरलाई कुटपिट गर्दा ज्यान गएको देखिन आएको डिएसपी श्रेष्ठले बताए । न्हुछेंलाई जगाती वृत्तमा राखिएको छ । जिल्ला अदालत भक्तपुरबाट म्याद थप गरि थप अनुसन्धान अघि बढाइएको डिएसपी श्रेष्ठले जनाएका छन् ।