भक्तपुर, १६ असार २०८०भक्तपुरका खेतवारीमा विषादीको प्रयोगबारे बुझ्न प्रमुख जिल्ला अधिकारी खगेन्द्र प्रसाद रिजालले एक बिहान बिताएका छन् । उनको नेतृत्वमा विज्ञसहितको टोलीले शनिवार बिहान केही कृषी खेती, विषादी बेच्ने पसल र कृषी बजारको स्थलगत अनुगमन गरेको हो ।
अविरल परेको पानीको पर्वाह नगरी शनिवार अनुगमनमा निस्केको टोली सूर्यविनायक १० स्थित ठुला कृषी फर्महरुमा पुगेको थियो । त्यहाँका किसान र मजदुर संग अन्तरक्रिया समेत गर्दै उक्त टोलीले तरकारीमा प्रयोग गरिने विषादीको अवस्थाबारे जानकारी लिएको थियो ।
कृषी फार्मका संचालकलाई विषादीको प्रयोगबारे पहिले नै अभिमुखीकरण गरिएकोले व्यवहारमा लागू गरे/नगरेको बुझ्न खेतावारीमै पुगेको प्रजिअ रिजालले प्रष्ट पारे । उनले विषादीको दुरुपयोग बारे संचालकहरु सचेत पाइएको बताए । बिक्री प्रयोजनले उत्पादन गर्ने कृषी फार्महरुलाई ग्राहकको स्वास्थ्यप्रति उत्तरदायी बनाउन अनुगमनलाई तीब्र बनाइएको उनले बताए ।
उत्पादनको शुरु प्रक्रिया देखि नै विषादी प्रयोग गरिएका रेकर्ड पुस्तिका नै बनाएर राख्न निर्देशन दिंदै प्रजिअ रिजालले विषादीको बोतल वा प्याकेटमा दिइएको संकेत र निर्देशन अनुसार प्रयोग गर्न र प्रयोग गरेपछि फल टिप्न पर्खनुपर्ने समयको बारेमा फार्ममा काम गर्ने मजदुर समेत जानकार हुनुपर्नेमा जोड दिए ।
फार्महरु अनुगमन पछि प्रजिअ रिजाल नेतृत्वको टोलीले जगातीस्थित विषादी बेच्ने पसलहरुको पनि अनुगमन गरेको छ । पसलमा विषादी जथाभावी खुला नराख्न उनले निर्देशन दिए । त्यस्तै विषादी किन्ने किसान वा फारमको रेकर्ड राख्नुपर्ने र बढी विषादी खपत गर्नेको विवरण जिप्रकामा जानकारी गराउन समेत उनले आग्रह गरे । प्रजिअ रिजालले बिषादी प्रयोग गर्ने तरिका, यसको असर र प्रभावबारे किसानलाई स्पष्ट पार्ने दायित्व बिक्रेताको भएको समेत बताए ।
उक्त टोलीले आदर्श स्थित हरित कृषी थोक बजारको समेत अनुगमन गर्दै विषादीको प्रयोग बारे थाह भए नभएको बारे बिक्रेता तथा उपभोक्ता संग अन्तरक्रिया गरेको थियो ।
प्रजिअ रिजाल नेतृत्वको टोलीमा सहायक प्रजिअ डोरेन्द्र निरौला, स्वास्थ्य कार्यालयका प्रमुख कृष्णबहादुर मिजार, कृषी अधिकृत नमिन्द्र सुवाल, पत्रकार महासंघ भक्तपुरका सचिव संजीप घिमिरे लगायत सहभागी रहेका थिए ।