प्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ आइतवार बिहान मध्यपुर थिमिमा आउने भएका छन् । नेपाल कम्युनिष्ट पार्टीका संस्थापक नारायण बिलाश जोशीको स्मृति भवनको उद्घाटन तथा प्रतिमा अनावरणको लागि प्रधानमन्त्री प्रचण्ड मध्यपुर थिमि आउने भएका हुन् ।

प्रधानमन्त्री प्रचण्डको प्रमुख आतिथ्यता रहने उक्त समारोहमा पूर्व कम्युनिष्ट प्रधानमन्त्रीहरु क्रमस नेकपा (एमाले) का अध्यक्ष केपी शर्मा ओली र नेकपा(एकीकृत समाजवादी) का अध्यक्ष माधवकुमार नेपाल र वरिस्ठ नेता झलनाथ खनालको पनि विशेष आतिथ्यता रहने नारायण बिलाश जोशी स्मृति प्रतिष्ठानका अध्यक्ष तथा बागमति प्रदेशका कृषि बिकास मन्त्री राजेन्द्र मान श्रेष्ठले जानकारी दिएका छन् ।

कम्युनिष्ट पार्टीका सस्थापक नेता नारायण बिलाश जोशीको ३४ औ स्मृति दिवासको अवसर पारेर आइतवार जोशीको स्मृतिमा मध्यपुर थिमि वडा न ४ मा निर्माण सम्पन्न स्मृति भवन र सोही परिसरमा जोशीको पुर्ण कदको प्रतिमा अनावरण गर्ने कार्यक्रम तय भएको बताइएको छ ।

नारायण बिलाश जोशी कम्युनिष्टहरुले आदरले शीर निहुराउने नेता हुन् । नेपाल कम्युनिस्ट पार्टीका स्थापना हुँदा संस्थापक महासचिव पुष्पलाल श्रेष्ठ रहेका थिए भने अन्य संस्थापक नेताहरुमा नारायण विलास जोशी, निरञ्जन गोविन्द वैद्य, नरबहादुर कर्माचार्य र मोतिदेवी श्रेष्ठ रहेका थिए ।

नेपालमा जहानियाँ राणा शासन कायम रहेका बेला भूमिगत रुपमा स्थापना भएको नेपाल कम्युनिष्ट पार्टीले सामान्तवाद, दलाल–नोकरशाही पूँजिवाद तथा साम्राज्यवादका शोषण उत्पीडनबाट नेपाली जनता र राष्ट्रलाई मुक्त गर्ने उद्देश्य राखेको थियो । पार्टीका सस्थापक हुनुको नाताले जोशीले कम्युनिष्ट आल्दोलन उठाउन गरेको योगदानको कम्युनिष्टहरुले उच्च मूल्यांकन गर्ने गरेका छन् ।