भक्तपुर, ८ साउन २०८०‘चाँगुनारायण सिटी एभोकाड़ो सिटी अभियान’ अन्तर्गत एक घर दुई विरुवा वितरण गर्ने र रोप्ने कार्यक्रम प्रभावकारी ढंगले अघि बढिरहेको छ । अभियान शुरु भएको एक सातामै अभियानले उल्लेखनीय प्रगती गरेको हो ।
यसैबीच चाँगुनारायण नगरपालिकाको वडा नम्बर ९ मा मंगलवार बिहान एभोकाड़ोको विरुवा वितरण कार्यक्रम तय गरिएको अभियानका संयोजक नरेश खड्काले जनाएका छन् । मंगलवार बिहान ७ बजे ताथली खर्कपूलमा निशुल्क बिरुवा वितरण गरिने उनले बताए । संयोजक खड्काले जनाए अनुसार एक सातामै तपादम्फु र नारायणटारमा गरी १ हजार १ सय बिरुवा रोप्ने कार्य सम्पन्न भएको छ भने मंगलवार ताथलीमा करिब ७ सय विरुवा वितरण गरिने कार्यक्रम रहेको छ ।
यसै साता बिहीवार दुवाकोट र शनिवार सुडालमा समेत बिरुवा वितरण गर्ने र रोप्ने कार्यक्रम रहेको बताइएको छ ।
‘चाँगुनारायण सिटी एभोकाड़ो सिटी अभियान’ का मूख्य परिकल्पनाकार एवं संरक्षक बागमती प्रदेश सरकारको मुख्यमन्त्रीका प्रमुख राजनीतिक सल्लाहकार डिपी ढकाल हुन् । अभियानमा प्रदेश सांसदहरु सुरेश श्रेष्ठ र भुवनकेशरी श्रेष्ठ पहिलो दिनबाटै जोडिएका छन् भने अर्का सांसद देवेन्द्र श्रेष्ठ नारायणटारको कार्यक्रमबाट अभियानमा जोडिएका छन् ।
यस अभियानमा अभियन्ता दिनेश खनाल, सुन्दर खनाल, चण्डिका लामिछाने, बिनोद लामिछाने लगायतको सक्रिय सहभागिता रहेको छ । शनिवार चाँगुनारायण माविमा सम्पन्न अभियानको पहिलो बैठकले सचिवालय बनाएर अघि बढ्ने र अभियानलाई अझ ससक्त र प्रभावकारी बनाएर लैजाने निर्णय लिएको अभियन्ता दिपेश लामिछानेले जानकारी दिएका छन् । सो बैठकले अभियानको प्रचार संयोजकको जिम्मेवारी भने नेपाल पत्रकार महासंघ भक्तपुरका सचिवसमेत रहेका पत्रकार संजीप घिमिरे ‘शुभचिन्तक’लाई दिएको बताइएको छ ।
के हो एभोकाडो
नेपालमा सोखले रोपिने एभोकाडो एक मीठो र महँगो घिउफल हो । केही वर्ष यता यसलाई व्यवसायिक रुपले रोपिने क्रम बढ्न थालेको छ ।
प्रशस्त भिटामिन, प्रोटिन र चिल्लो पदार्थ पाइने एभोकाडोको माग नेपालमा बढ्दै गएको छ भने विदेश समेत निर्यात गर्न सकिने भएकोले बजार नपाउने समस्या छैन । एभोकाडोको एउटा बोटले तीन क्विन्टलसम्म फल दिने र वार्षिक पचास हजार सम्म आम्दानी हुने बताइन्छ ।
एभोकाडोको बोट मद्यम उचाइको हुने र सदाबहार हरियो रहने हुँदा यसले घर र शहरको सौन्दर्य बढाउँन, स्वच्छ वायु प्रवाह गर्न र वातावरण जोगाउन समेत मद्दत गर्दछ ।