चाँगुनारायण, ११ साउन २०८०भक्तपुरको चाँगुनारायण नगरपालिकामा संचालित ‘चाँगुनारायण सिटी, एभोकाडो सिटी अभियान’ अन्तर्गत चौथो पटक विरुवा वितरण गर्ने र रोप्ने कार्यक्रम सम्पन्न भएको छ । अभियान शुरु भएको २ सातामै चौथो कार्यक्रम सम्पन्न भएको हो ।
बिहीवार चाँगुनारायण नगरपालिका वडा नम्बर १ मा एभोकाडो बितरण गर्ने र रोप्ने कार्यक्रम सम्पन्न भएको अभियन्ता बिनोद लामिछानेले बताए । स्थानीयको व्यापक उत्साहका बीच ४ सय २० बिरुवा वितरण गर्ने र रोप्ने कार्य सम्पन्न भएको अभियानको संयोजक नरेश खड्काले जनाएका छन् । संयोजक खड्काले जनाए अनुसार अभियान शुरु भएको २ सातामै चाँगु नारायणका ४ ठाउँमा बिरुवा वितरण गरिएको छ भने १ हजार बढी घरमा २ वटा एभोकाडोको विरुवा रोपिएको छ ।
बिरुवा वितरण गर्ने र रोप्ने कार्यक्रमलाई बिहीवार सम्बोधन गर्दै अभियन्ता दिनेश खनालले चाँगुनारायणलाई एभोकाडोको शहर बनाउने बागमती प्रदेश सरकारको मुख्यमन्त्रीका प्रमुख सल्लाहकार डिपी ढकालको सोच राम्रो लागेर अभियान शुरु गरिएको जानकारी गराए । उनले यो कुनै राजनीतिक वा, हचुवाको अभियान नभई चाँगुनारायणलाई स्वस्छ, सुन्दर र सम्बृद्ध बनाउने योजनावद्ध अभियान भएको दावी गरे ।
उक्त कार्यक्रममा अभियन्ताहरुलाई उत्साह दिन बागमती प्रदेश सभाका सदस्य द्वय देवेन्द्र श्रेष्ठ र सुरेश श्रेष्ठ समेत सहभागी भएका थिए । सांसदद्वय श्रेष्ठले चाँगुनारायणको सौन्दर्य र सम्वृद्धिको लागि अभियानले सहयोग पुर्याउने बिश्वास व्यक्त गरे । उनीहरुले अभियानलाई स्थानीय सरकार र संघ सस्थाले सहयोग गर्नुपर्ने आवश्यकता औल्याउदै आफ्नो र प्रदेश सरकारको तर्फबाट साथ् र सहयोग हुने आश्वासन समेत दिएका छन् ।
अभियानमा एक्यवद्धता प्रकट गर्न वडा नम्बर १ का वडाध्यक्ष सिजन कार्की र २ नम्बर वडाका वडाध्यक्ष सोम प्रधानसमेत उपस्थित रहेका थिए । उक्त अवसरमा अभियन्ताहरु सुनिल गोठे, सुन्दर खनाल, चण्डिका लामिछाने, नवराज काफ्ले, राम खड्का, रामकुमार तामाङ, रामभक्त खत्री, सरराज उप्रेती, लक्ष्मण दुलाल लगायतको सहभागिता रहेको अभियन्ता दिपेश लामिछानेले जानकारी दिए ।
यस अघि मंगलवार बिहान चाँगुनारायणको वडा नम्बर ९ ताथलीमा एभोकाडो बितरण गर्ने र रोप्ने कार्यक्रम सम्पन्न भएको थियो भने आगामी कार्यक्रम शनिवार बिहान चाँगुनारायण ८ सुडालमा राखिएको अभियानका प्रचार संयोजक समेत रहेका अभियन्ता संजीप घिमिरे शुभचिन्तकले जनाएका छन् ।
