भक्तपुर, २६ साउन २०८० भक्तपुरको चाँगुनारायण नगरपालिकाबाट नेपाली नक्कली नोटसहित मानिसहरु पक्राउ परेका छन् । सिन्धुपाल्चोकको बलेफी नगरपालिका घर भई चाँगुनारायण ४ बुढाथोकी गाउँ बस्ने अर्जुन सुवेदीको कोठाबाट नेपाली जाली नोट(नक्कली नोट) सहित मानिसहरु पक्राउ परेका हुन् ।
सुवेदीको कोठाबाट एक हजारका पन्ध्र सय वटा जाली नोट बरामद गरिएको बताइएको छ । साथै, कम्प्युटर र कलर प्रिन्टर समेत प्रहरीले बरामद गरेको छ । बिहिबार बेलुकी बुढाथोकी गाउँ पुगेको प्रहरीले सुवेदी सहित मानिसहरु तथा जाली नोट र सामान बरामद गरेको हो ।
पक्राउ पर्नेमा बिभिन्न जिल्लाका ९ जना रहेपनि स्थानीय भने नरहेका भक्तपुर प्रहरीले जनाएको छ । जिल्ला प्रहरी परिसर भक्तपुरका डिएसपी बसन्त पाठकले बताए अनुसार काठमाडौको थानकोटमा नक्कली नोट सहित पक्राउ परेका अभियुक्तमाथि अनुसन्धान गर्ने क्रममा चाँगुसम्म जालो जोडिएको पत्ता लागेपछि प्रहरीले छापा मारेको हो ।
जिल्ला प्रहरी परिसरसंग समन्वय गरेर आएको थानकोटको प्रहरीले चाँगुबाट पक्राउ परेका सबै व्यक्ति र सामान आफैसंग लगेका जिल्ला प्रहरी परिसर भक्तपुरका डिएसपी पाठकले प्रष्ट पारेका छन् । सो सम्बन्धी अनुसन्धानमा भक्तपुर प्रहरीको संलग्नता नरहेको उनले बताए ।