मध्यपुर थिमि, २८ साउन २०८०आँखा पाक्ने रोगको संक्रमण बाट बालबालिकालाई बचाउन मध्यपुर थिमि नगरपालिकाले दुई दिन विद्यालय बन्द गर्ने निर्णय गरेको छ । आँखा पाक्ने रोगको संक्रमण दर बढेको र यसबाट विद्यार्थीहरु बढी प्रभावित भएको पाइएपछि नगरपालिकाले दुई दिन विद्यालय बन्द गर्ने निर्णय गरेको हो ।
नगरपालिकाको निर्णय अनुसार आइतवार र सोमबार दुई दिनका लागि विद्यालय बन्द हुने शिक्षा शाखाका प्रमुख ज्ञानेन्द्र प्रसाद भट्टले जनाएका छन् । शिक्षा शाखाका प्रमुख भट्टले सूचना जारी गरी विद्यालय बन्द रहने जानकारी गराएका हुन् भने सूचनामा भीडमा नजान, संक्रमित व्यक्तिको सम्पर्कबाट बच्न, संक्रमितको सामान प्रयोग नगर्न र सरसफाइमा ध्यान दिन सुझाव दिइएको छ ।
नगरपालिकाका उपप्रमुख विजय कृष्ण श्रेष्ठले नीजि तथा संस्थागत विद्यालयका प्रतिनिधि र चिकित्सकहरु सहितको छलफलमा दुई दिनको लागि विद्यालय बन्द गर्ने प्रस्ताव आएपछि निर्णय गरिएको बताए ।
मध्यपुर थिमि नगरपालिकाका प्रमुख सुरेन्द्र श्रेष्ठले पहिलो चरणमा संक्रमणको चेन ब्रेक गर्नपर्ने भएकाले दुई दिन विद्यालय बन्द गर्ने निर्णय गरिएको जानकारी गराए । दुई दिनपछिको अवस्था हेरेर विद्यालय बन्द गर्ने वा नगर्ने भन्ने निर्णय गरिने उनले प्रष्ट पारेका छन् ।
मध्यपुरमा विद्यार्थी मात्र नभई शिक्षक पनि आँखा पाक्ने रोगले प्रभावित भएका छन् । नेपाल कोरिया मैत्री नगरपालिका अस्पताल थिमिमा आउने आँखाका बिरामीहरुमा ५० प्रतिशत भन्दा बढी आँखा पाक्ने रोगका बिरामी रहेको डा. सदिक्षा श्रेष्ठले जानकारी गराएकी छन् ।