भक्तपुर, ३ भदौ २०८०भक्तपुरको चाँगुनारायण नगरलाई एभोकाडो फलको शहर बनाउने उदेश्यले संचालित ‘चाँगुनारायण सिटी, एभोकाडो सिटी’ अभियानप्रति विद्यार्थीहरुले ऐक्यवद्धता प्रकट गरेका छन् । अखिल (क्रान्तिकारी) को अगुवाइमा आइतवार भक्तपुर क्याम्पस परिसरमा एभोकाडोका विरुवा रोप्दै विद्यार्थीहरुले अभियानप्रति ऐक्यवद्धता प्रकट गरेका हुन् ।
उक्त अवसरमा अभियानका परिकल्पनाकार एवं बौद्धिक नेता डिपी ढकालले विद्यार्थीहरुले समाज र राष्ट्र लाई नयाँ कुरा दिनसक्नुपर्नेमा जोड दिएका छन् । एभोकाडोले परम्परागत रुपमा रहँदै आएका फलफूलको तुलनाम बढी उत्पादन र आम्दानी दिने भएकाले यसलाई रोप्ने र संरक्षण गर्न सचेत विद्यार्थी वर्गले समाजलाई प्रेरित गर्नुपर्ने उनले प्रष्ट पारे । ‘चाँगुनारायण सिटी, एभोकाडो सिटी’ अभियान पर्यावरणलाई स्वच्छ र सुन्दर बनाउन तथा स्थानीयको स्वास्थ्य र आयश्रोत अभिवृद्धि गर्न शुरु गरिएको सामाजिक अभियान भएकोले यो विद्यार्थी वर्गको पनि अभियान भएको उनको भनाइ छ ।
उक्त अवसरमा अभियानका परिकल्पनाकार एवं मुख्य संरक्षक समेत रहेका बागमती प्रदेशका मुख्यमन्त्रीका प्रमुख राजनीतिक सलाहकार डिपी ढकालको प्रमुख आतिथ्यतामा क्याम्पस परिसरमा एभोकाडोको विरुवा रोपिएको स्वतन्त्र विद्यार्थी युनियनका ससचिव मासबहादुर लामाले जनाएका छन् । भक्तपुर क्याम्पसमा रोपिएको एभोकाडो विरुवाले यसको महत्वमाथि प्रकाश पार्ने र यहाँ अध्ययनरत छ हजार विद्यार्थीले यसको उपयोगिताबारे बुझ्न र बुझाउन सक्ने उनले विश्वास व्यक्त गरे ।
उक्त अवसरमा सहायक क्याम्पस प्रमुख लक्ष्मी सुन्दर लवजु, प्राध्यापक रामप्रसाद भुर्तेल, सभापति पुकार पराजुली र अखिल (क्रान्तिकारी)का इकाई अध्यक्ष अन्जित तामाङ्ग लगायतले एभोकाडो अभियानको सफलताको कामना गरेका थिए । कार्यक्रममा अभियन्ताहरु सुनिल बासु, श्रीराम खाइजु, संजीप शुभचिन्तक लगायतको समेत सहभागिता रहेको थियो । 