जिल्ला प्रशासन कार्यालय भक्तपुरले एक शताब्दी पुगेकी एक सेवाग्राहीलाई घरमै पुगेर सेवा दिएको छ । जिल्ला प्रशासन कार्यालयले सय वर्षकी जेष्ठ नागरिक मोतिमाया बज्राचार्यलाई उनको नागरिकताको प्रमाण पत्र घरमै पुगेर दिएको हो ।

आइतवार कार्यालयकी प्रशासकीय अधिकृत उर्मिला खतिवडा घिमिरे नागरिकता बोकेर बज्राचार्यको घरमै पुगेकी थिइन् । मध्यपुर थिमि नगरपालिका वडा नम्बर ४ स्थित बज्राचार्यको घरमै पुगेर उनले नागरिकताको प्रमाणपत्र प्रदान गरिन । बज्राचार्यको नागरिकता प्रमाणपत्रको प्रतिलिपि आवश्यक भएको भन्दै परिवारले सम्पर्क गरेपछि घरमै पुगेर सेवा प्रदान गरिएको खतिवडाले बताएकी छन् । एक शताब्दी पुगेकी जेष्ठ नागरिकलाई सेवा दिन पाउँदा सन्तुष्टि मिलेको उनको प्रतिक्रिया छ ।

भक्तपुरका प्रमुख जिल्ला अधिकारी खगेन्द्र प्रसाद रिजालले जेष्ठता, अपाङ्गता लगायतका विशेष कारणले कार्यालयमा उपस्थित हुन कठिनाइ हुने सेवाग्राहीलाई कार्यालयले घरमै पुगी सेवा प्रवाह गर्दै आएको जानकारी गराएका छन् । यसबाट सेवाग्राही र परिवारजनमा समेत राज्यप्रति सकारात्मक भाव पैदा हुने उनले बिश्वास व्यक्त गरे ।