संघीय सरकारका पूर्वमन्त्री एवं भक्तपुर-२ बाट निर्वाचित पूर्व  सांसद महेश बस्नेतले पहिरो नियन्त्रणमा पहल लिएका छन् । स्थानीय सरकार प्रमुख र प्रदेश सरकारको सरोकारवाला कार्यालय संग समन्वय गरि उनले पहिरो नियन्त्रणका लागि पहल गरेका हुन् ।

पूर्व सांसद बस्नेतको आफ्नै गाउँ सूर्यविनायक-७ गुण्डुमा पहिरोको जोखिम बढेपछि त्यसको रोकथाम र नियन्त्रणमा बस्नेत लागिपरेका उनका स्वकीय सचिव दिनेश थापाले बताए । गुण्डुको मगरगाउँ र भिमसेन्स्थान मन्दिरको पहिरो रोक्ने ब्यवस्था मिलाउन उनी पहिरो निरीक्षण र समाधानका लागि नगरप्रमुख बासुदेव थापा, जलस्रोत तथा सिंचाई विकास डिभिजन कार्यालय भक्तपुरका प्रमुख विनय मिश्र लगायतलाई लिएर पहिरो जोखिम क्षेत्रतर्फ गएका छन् । मंगलवार उनको नेतृत्वमा गएको टोलीले  सूर्यविनायक-१० चित्तपोलको दुलाल टोल र बस्नेत टोलमा गएको पहिरो पनि अवलोकन गरेको छ ।

अवलोकनमा वडा नम्बर ७ का वडा अध्यक्ष रविन्द्र सापकोटा र १० का शिवराम राउत, वडा सदस्यहरु र सम्बन्धित वडाका प्रबिधिकहरु समेत सहभागी रहेका थिए । स्थलगत निरीक्षण पछि सो क्षेत्रमा थप क्षति हुन नदिन तत्काल अति आवश्यक ठाउँहरुको पहिचान गरी काम थाल्न पूर्व सांसद बस्नेतले आग्रह गरे । नगरपालिका र जलस्रोत तथा सिंचाई विकास डिभिजन कार्यालय भक्तपुरबाट तत्काल बजेट निकासा गरी काम सुचारु गर्ने प्रतिवद्धता प्राप्त भएको पूर्व मन्त्री बस्नेतका स्वकीय सचिव थापाले बताएका छन् ।