भक्तपुर, १९ भदौ २०८०नेपाल रेडक्रस सोसाइटी मध्यपुर थिमि उपशाखाले ६१ औं नेपाल रेडक्रस दिवस मनाएको छ । रेडक्रस दिवसको अवसरमा प्रशिक्षणात्मक अन्तरक्रिया सम्पन्न गरिएको हो ।
उक्त अवसरमा उपशाखाका सभापति बाबुकाजी श्रेष्ठले रेडक्रसको स्थापना, रेडक्रसको महत्व, रेडक्रस सिद्धान्त र उपशाखाले गर्दै आइरहेको कार्यक्रमको बारेमा प्रकाश पारेका थिए । उपशाखाका संस्थापक सभापति दुर्गामोहन श्रेष्ठले “म सेवा गर्छु” वा“मनैदेखि सेवागर्छु” भन्ने भावनाले रेडक्रसमा लागेको बताउदै भक्तपुर जिल्लाकै पहिलो उपशाखाको रुपमा स्थापित मध्यपुर थिमि उपशाखाले निरन्तर जनसेवा पुर्याइरहेकोमा गर्व लागेको बताए । मध्यपुर थिमि उपशाखा उत्कृष्ट उपशाखा पुरस्कारद्वारा सम्मानित भएको स्मरण गर्दै उनले समुदायमा शवबाहन सेवा संचालनलाई निरन्तरता दिइरहेकोमा सन्तोष व्यक्त गरे ।
उपशाखाका उपसचिव सुशिला श्रेष्ठले स्वागत सहित संचालन गरेको कार्यक्रममा पूर्व सभापतिहरु, विद्यालयका युवा सर्कलका प्रतिनिधिहरु, आजीवन सदस्यहरु, उपसमिति का संयोजक एवं सदस्यहरु र कार्यसमितिका पदाधिकारी एवं सदस्यहरुको सहभागिता रहेको थियो ।
