भक्तपुरको दरवार क्षेत्रमा रहेको श्री पद्म माध्यमिक विद्यालयमा नि:शुल्क स्वास्थ्य जाँच गरिने भएको छ । शनिवार विद्यालयको स्वास्थ्य इकाई समितिले सबैका लागि नि:शुल्क स्वास्थ्य जाँच कार्यक्रम आयोजना गरेको हो ।

विद्यालयका प्राचार्य राम हाडाले धुलिखेल अस्पतालको प्राविधिक सहयोगमा शनिवार स्वास्थ्य शिविर संचालन गरिने बताएका हुन् । शनिवार बिहान ९ बजेदेखि शुरु हुने शिविर बेलुकी ४ बजेसम्म संचालन हुने उनको भनाइ छ । उक्त अवसरमा मुटु रोग, स्त्रीरोग, हाडजोर्नीको साथै सामान्य चिकित्साका परीक्षण समेत गरिने प्राचार्य हाडाले जानकारी गराए ।

विद्यालयका प्राचार्य हाडाले शिविरमा सहभागी भई स्वास्थ्य परीक्षण गराउन समेत सबै विद्याथी, शिक्षक, अभिभावकका साथै आम जनसमुदायलाई अपिल गरेका छन् ।