भक्तपुर जिल्लामा पनि २० औँ निजामती सेवा दिवस उत्साहका साथ् मनाइएको छ । ‘व्यवसायीक र सृजनशील प्रशासन : विकास, सम्वृद्धि र सुशासन’ भन्ने नाराका साथ् देशभर मनाइएको निजामती सेवा दिवस भक्तपुरमा पनि उत्साहका साथ् मनाइएको हो ।

प्रमुख जिल्ला अधिकारी खगेन्द्र प्रसाद रिजालले शुक्रबार बिहान कार्यालय परिसरमा सरसफाई र वृक्षारोपण गरी शुरु गरिएको निजामती सेवा दिवस अन्तरक्रिया र पुरस्कार वितरण लगायतका विभिन्न कार्यक्रम गरी सम्पन्न गरिएको थियो ।

शुक्रवार जिल्ला प्रशासन कार्यालयमा आयोजित जिल्ला समारोहमा जिल्लास्थित कार्यालयका प्रमुख एवं प्रतिनिधि त्यसैगरी कर्मचारीका बिभिन्न संघसंगठनका प्रतिनिधिहरुको सहभागिता रहेको थियो ।

उक्त अवसरमा सहभागीहरुले निजामती सेवा ऐनको मस्यौदा पढ्न समेत नपाउनु अन्यायपूर्ण भएको बताएका थिए । मस्यौदा बन्द कोठामा तयार हुने र सरोकारवालाहरूलाई नै बेखबर बनाइ ऐन ल्याउदा अपनत्व नहुने उनीहरुको गुनासो रहेको छ । उनीहरुले निजामती सेवालाई थप प्रभावकारी बनाउन प्रशासनिक नेतृत्व सक्षम हुनुपर्ने र राज्यले निजामती कर्मचारीलाई अपनत्व जागृत गराउन सक्नुपर्नेमा जोड दिए ।

कार्यक्रममा नेपाल पत्रकार महासंघ भक्तपुरका अध्यक्ष जगतकृष्ण प्रजापतिले कुनैपनि सरकार वा व्यवस्थाका लागि कर्मचारी तन्त्र अपरिहार्य भएको भन्दै सरकार वा व्यवस्थाको सफलता वा असफलता कर्मचारीमा निर्भर रहने उल्लेख गरे । वर्तमान व्यवस्था रक्षाको लागि कर्मचारी वर्गले जनमुखी सेवा प्रवाह गर्न उनले सुझाव समेत दिए । भक्तपुरमा पछिल्लो समय सुशासनको प्रत्याभूति हुँदै गएको उनको भनाइ छ ।

कार्यक्रमलाई सम्बोधन गर्दै भक्तपुरका प्रमुख जिल्ला अधिकारी खगेन्द्र प्रसाद रिजालले कर्मचारीतन्त्रको बिकल्प सुधारिएको कर्मचारीतन्त्र नै भएको भन्दै कर्मचारी बिनाको राज्य कल्पना गर्न नसकिने बताए । कर्मचारी तन्त्र राज्यको हात खुट्टा मात्र नभई मष्तिस्क समेत भएको उनको भनाइ छ । उनले राज्यमा सुशासन, बिकाश र सम्बृद्धिका लागि कर्मचारीहरुले नि:स्वार्थ सेवा गर्नुपर्नेमा जोड दिंदै भक्तपुरका कर्मचारीलाई आदर्शको पर्याय भएर जनताको सेवा गर्न निर्देशन समेत दिएका छन् । काममा आलटाल गर्ने, अनियमितता गर्ने, भ्रष्टाचार गर्ने आरोप कर्मचारी वर्गले झेल्नुपरेको बताउदै प्रजिअ रिजालले भक्तपुरले त्यस्ता खाले आरोपलाई खारेज गर्नेगरी जनताको चाहना बमोजिम सेवा प्रवाह गर्नुपर्नेमा जोड दिए ।

उनले सरकारले ल्याउन लागेको निजामती सेवा ऐन सचिव देखि कार्यालय सहयोगी सम्मलाई अपनत्व हुनेगरी सबै कर्मचारीको साझा हितमा रहने बिश्वास समेत व्यक्त गरे । प्रजिअ रिजालले निजामती सेवा दिवस मनाउँदा सेवा प्रवाहमा अवरोध हुनसक्ने भएकाले यो दिन सरकारी बिदा हुनुपर्ने समेत बताएका छन् ।

साथै, निजामती सेवा दिवस, २०८० काे अवसरमा जिल्ला प्रशासन कार्यालयका नायव सुब्बा बिमल कुमार काफ्ले लाई आ.व.०७९/८० काे उत्कृष्ट कर्मचारीको रुपमा पुरस्कृत समेत गरिएको कार्यालयकी प्रशासकीय अधिकृत उर्मिला खतिवडाले जानकारी गराएकी छन् ।