जिल्ला प्रहरी परिसर भक्तपुरका प्रमुख रहेका एसपी प्रजित केसीको कार्यकालमा अदालतको फैसला कार्यान्वयनले रेकर्ड ब्रेक गरेको छ । एसपी केसीको कार्यकालमा १ सय ९९ फरार अपराधीलाई भक्तपुर प्रहरीले पक्राउ गरी अघिल्लो रेकर्ड ब्रेक गरेको हो ।

सोमबार बिदाई कार्यक्रममा पत्रकारसंग कुराकानी गर्दै उनले फैसला कार्यान्वयनमा सर्वाधिक उपलब्धि हासिल भएको जानकारी गराएका हुन् । अघिल्लो नेतृत्वमा फैसला कार्यान्वयनको अवस्था २८ रहेकोमा ५३४ प्रतिसत वृद्धि गर्न सफल भएको उनले प्रष्ट पारे । अदालतबाट सजाय भएपनि अपराधी फरार हुँदा न्यायको अनूभूति नहुने र अपराधीको मनोबल बढ्ने हुँदा अपराध नियन्त्रणलाई प्रभावकारी बनाउन फैसला कार्यान्वयनका लागि विशेष टास्क फोर्स बनाई काम गरिएको र सफलता प्राप्त भएको उनको भनाइ छ ।

त्यसैगरी उनले संवेदनशील क्षेत्रमा १ सय १८ वटा सीसीटीभी थप गरिएको जानकारी गराए । प्रहरी आफैले प्रत्यक्ष मनिटरिङ्ग गर्नेगरी ती सीसीटीभी थप गरिएको उनले जानकारी गराएका हुन् । त्यसका अलावा पनि दर्जनौ सीसीटीभी नगरपालिका र बैंकहरुसंग सहकार्य गरी जडान गरिएका उनले जनाएका छन् । जिल्लामा जंगल क्षेत्र बढी हुँदा अपराधीलाई भाग्न सजिलो हुने देखिएपछि स्मार्ट पुलिसिङ्लाई प्रभावकारी बनाइएको उनले बताए । चोरी, सिक्री लुटेरा र नक्कली डलर देखाइ ठगी लगायतका अपराध नियन्त्रणमा उल्लेख्य प्रगति गरिएको परिसर प्रमुख केसीले जिकिर गरेका छन् ।

भक्तपुरको बिस्का: जात्रामा हुने झडप र क्षती नियन्त्रण गर्न समेत एसपी केसीको कार्यकाल सफल देखिएको छ । त्यसका लागि आफ्नो टोलीले बिस्का लाई शान्तिपूर्ण सम्पन्न गर्न ३ महिना अघि देखि काम गरेको उनले खुलासा गरेका छन् । ‘प्रहरीले खोज्न थालेपछि अघिल्लो बिस्कामा ढुंगा हान्नेहरु भागेर पोखरा पुगेका थिए ।” उनले खुलासा गरे ।

एसपी केसीको कार्यकालमा निर्वाचन समेत परेको थियो । निर्वाचन क्षेत्र नम्बर २ लाई त्यतिबेलाा निकै संवेदनशील मानिएको थियो । तर, निर्वाचनलाई शान्तिपूर्ण सम्पन्न गर्न प्रहरी सफल भएको थियो । उनको कार्यकालमा बिट थप गर्ने, प्रभागहरुको जग्गा प्राप्ती र भवन निर्माणका काम मात्र भएनन्, तल्लो दर्जाका प्रहरीका साना साना खुशीमा समेत एसपी केसी जोडिएर हौसला प्रदान गर्ने परिपाटी प्रारम्भ गरेका छन् ।

राजनीतिक नेतृत्वको चाकरी नगर्ने स्वभावका केसीको १३ महिना ९ दिनको कार्यकाल अत्यतिर आइपुग्दा भने बिबादरहित बन्न सकेन । भदौ ४ गते सानोठिमीको बाल सुधार गृह ब्रेक गरी त्यहाँस्थित बालबिज्याइकर्ताले बिद्रोह गरेको घटनाले देशमै सनसनी मच्चीयो । यद्यपी, उनीहरुलाई सुधार गृहमा फर्काउन भने प्रहरी सफल रहेकाले फेस सेभको अवस्था रह्यो । मानव अधिकार र बाल अधिकार संग जोडिएको उक्त घटनामा बिना हतियार तैनाथ प्रहरीको कमजोरी नरहेको एसपी केसीले जिकिर गरेका छन् । छानबिन समितिले पनि सो घटनामा सुधार गृह प्रशासनको जिम्मा पाएको युसेप नेपालको कमजोरी रहेको उल्लेख गरेको छ । आफ्नो कार्यकालमा जिल्लाको शान्ति सुरक्षाको स्थिति संतोषजनक रहेको, होटल ब्यवसायलाई रातिको समयमा अनावश्यक दुख नदिइएको, प्रहरी संग स्थानीय डराउने गरि प्रस्तुत नरहेको र मानव अधिकार हननका कुनै पनि घटना नभएको एसपी केसीले जनाएका छन् ।

सोमबार नै भक्तपुरको नयाँ प्रहरी प्रमुखमा एसपी बेद बिष्टले पदभार ग्रहण गरेका छन् । पत्रकारसंग कुराकानी गर्दै एसपी बिष्टले भक्तपुरको शान्ति सुरक्षा र अपराध नियन्त्रणमा सबैसंग मिलेर अघि बढ्ने उल्लेख गरेका छन् ।