राष्ट्रिय निजी तथा आवासीय विद्यालय एसोसियसन नेपाल (नेशनल प्याब्सन) भक्तपुरको अध्यक्षमा पुन: संजय खड्का निर्वाचित भएका छन् । शनिवार सम्पन्न छैठौं जिल्ला अधिवेशनबाट मदरल्याण्ड स्कूलका संचालक/प्रिन्सिपल संजय खड्काको अध्यक्षतामा १३ सदस्यीय जिल्ला कार्यसमिति निर्वाचित भएको हो ।

अधिवेशनले वरिष्ठ उपाध्यक्षमा शिव कृष्ण कवां र उपाध्यक्ष राम प्रसाद खाताखाेलाई निर्वाचित गरेको छ भने सचिवमा कुमार थापा मगर र सहसचिवमा दिनेश शाक्य निर्वाचित भएका छन् । त्यसैगरी कोषाध्यक्षमा बिक्रम थापा र सह-कोषाध्यक्ष- रत्नबहादुर राई निर्वाचित भएका बताइएको छ ।

कार्यसमिति सदस्यहरुमा भने रमेश प्रसाद सिटौला, प्रतिमा माक, सुमन शिल्पकार, शर्मिला खड्का, कमल सुवाल र अशोक श्रेष्ठ रहेका छन् । अधिवेशनको बन्द सत्रबाट कार्यसमिति निर्विरोध निर्वाचित भएको हो ।

शनिवार बिहान नगरकोट स्थित हिमालयन ग्लासियरमा नेशनल प्याब्सनका केन्द्रीय अध्यक्ष पाण्डव हमालले जिल्ला अधिवेशन उद्घाटन गरेका थिए । उद्घाटन सत्रलाई सम्बोधन गर्दै केन्द्रीय अध्यक्ष हमालले नेशनल प्याब्सनले विद्यालय संचालकका समस्याहरु समाधान गर्न र देशमा शिक्षाको जग बलियो बनाउन महत्वपूर्ण भूमिका खेलिरहेको जिकिर गरेका थिए । उनले भक्तपुर जिल्ला शाखामा सबै एकताबद्ध रहेको प्रति सन्तोष व्यक्त गर्दै एकतामा नै बल हुने बताए । सदस्यहरुको समस्या र शिक्षाको समस्या सामाधान गर्न जिल्लालाई केन्द्रले सहयोग गर्ने बताउदै उनले केन्द्र पनि आफ्ना शाखा र सदस्यहरुको सक्रियताले नै सक्षम र जीवन्त बन्ने बिचार व्यक्त गरेका थिए ।

उद्घाटन सत्रमा नेशनल प्याब्सनका केन्द्रीय उपाध्यक्षहरु शम्भु अधिकारी र डम्बर कार्की त्यसैगरी सचिव, कोषाध्यक्षका साथै बागमती प्रदेश अध्यक्ष नारायण खड्का, काठमाडौं जिल्ला अध्यक्ष र ललितपुरका उपाध्यक्षले समेत मन्तब्य राखेका थिए ।  कार्यक्रममा नेपाल पत्रकार महासंघ भक्तपुरका सचिव संजीप घिमिरे शुभचिन्तकको पनि आतिथ्यता रहेको थियो ।

उक्त अवसरमा भक्तपुरका सास्कृतिक सम्पदा संरक्षण विद रविन्द्र पुरीलाई विशेष सम्मान समेत गरिएको थियो भने सदस्य विद्यालयहरुलाई प्रमाण पत्र वितरण गरिएको थियो ।

राष्ट्रिय निजी तथा आवासीय विद्यालय एसोसियसन नेपालको सदस्यता नवीकरण गरेका पैतिस विद्यालयका प्रतिनिधिहरु अधिवेशनको बन्द सत्रमा सहभागी रहेका थिए ।