चाँगु नारायण नगरपालिकाका मेयर जीवन खत्रीले आगामी २०८२ साललाई धार्मिक पर्यटन बर्ष मनाउने तयारी गरिएको जानकारी गराएका छन् । २०८२ साल लाई नगरपालिकाले धार्मिक पर्यटक भित्राउने वर्षको रुपमा मनाउन लागेको उनले बताएका हुन् ।

चाँगु नारायण ९ ताथली स्थित छोरीको घर जेष्ठ नागरिक आश्रमको सहयोगार्थ संचालित १७ दिने श्रीमद भागवत विराट पितृ मुक्ति महायज्ञको बिहिवार उद्घाटन कार्यक्रमलाई सम्बोधन गर्दै नगर प्रमुख खत्रीले चाँगुनारायणको पहिचान वृद्धिमा समेत यसले योगदान गर्ने बिश्वास व्यक्त गरे । चाँगुनारायण नगरपालिका आफैमा धार्मिक स्थलले भरिपूर्ण स्थान हो ।” नगरप्रमुख खत्रीले भने “विगतदेखि बिभिन्न सास्कृतिकले भरिपूर्ण रहेको हाम्रो नगरको शिर उच्च बनाउनको लागी हाल सञ्चालन भएको महायज्ञले पुलको काम गरेको छ ।”

छोरीको घर जेष्ठ नागरिक आश्रमका लागि नगरपालिकाको तर्फबाट पनि सहयोग गर्ने आश्वासन दिएका छन् । चागुनगरबासी मिलेर आयोजकको सपना साकार पार्ने उनले बताए ।

ताथलीमा रहेको छोरीको घर जेष्ठ नागरिक आश्रमको लागी जग्गा खरिद गरि भवन निर्माणको लागी महायज्ञ आयोजना गरिएको आयोजकले जनाएको छ ।