चाँगुनारायण, २१ असोज २०८० चाँगुनारायण नगरपालिकाको बजार अनुगमन समितिले वडा नम्बर २ स्थित दुवाकोट एरियामा रहेको मिनिमार्ट र खाद्य पसल अनुगमन गरेको छ । आइतवार उपभोक्ताको हित संरक्षण हेतु उक्त क्षेत्रको मार्ट र पसल अनुगमन गरिएको हो ।
बजार अनुगमनको संयोजक एवं नगर उपप्रमुख रमेश बुढाथोकीको नेतृत्वमा सरोकारवालासहित अनुगमन गरिएको अधिकृत सुरज पौडेलले जनाएका छन् ।
अनुगमनमा दुवाकोट खाद्य स्टोरमा टाइचीन चिउरामा उपभोग्य मिति लेवल नभएको हुनाले अनुचित व्यवसायीक जन्य क्रियाकलाप गरिको ठहर गर्दै पहिलो पटक सचेतनाका लागि उक्त खाद्य स्टोरलाई रु. पाँच हजार जरिवाना गरिएको छ ।
पाथिभरा खाद्यले स्टोर म्याद नाघेको धारा तेल ४ पाकेट, बिगुल तेल ४ पाकेट, दिव्य ५ पाकेट, क्विक्स चिजवल ६० पाटेक, क्विक्स चिप्स ४० पाकेट र चोकके अन चकलेट ३ वट्टा जफत गरि नष्ट गरिएको छ । साथै, नगरपालिकामा दर्ता नभएकोले ७ दिन भित्र व्यवसाय दर्ता नविकरण गर्न दिर्नेशन दिइएको बताइएको छ ।
बस्ताकोटी किराना स्टोरमा बिक्री गर्न राखेको भुजियामा उपभोग्य मिति नभएको र प्याकेजिङ्ग सामानहरु खाद्य अनुज्ञा पत्र लिई लेवल राखी मात्र विक्री वितरण र म्याद नाघेको सामानहरू छुट्टै राख्न निर्देशन दिइएको र रु. २ हजार जरिवाना गरिएको छ ।
त्यस्तै के. एम. सि. किराना पसलमा प्याद नाघेको ध्यू १ वट्टा र कुकिज १ पाकेट नष्ट गरिएको छ । व्यवसाय दर्ता गर्न ७ दिन भित्र नगरपालिकामा दर्ता गर्न निर्देशन दिइएको अधिकृत पौडेलले पुष्टि गरेका छन् ।
डेलि ग्रोसरी प्रा.लि.मा खरिद बिल राख्न र बिक्री मूल्य सार्वजनिक गर्न निर्देशन दिइएको र म्याद नाघेको सामान बेच्ने सामान भन्दा अलग राख्न निर्देशन दिइएको छ ।
नगरपालिकाका बजार अनुगमन अधिकृत सुरज पौडेलले जनाए अनुसार बजार अनुगमनमा जिल्ला प्रशासन कार्यालयका प्रतिनिधि यादव मिश्र र दुवाकोट प्रहरी प्रभागका प्रमुख किशोर ध्वज कार्कीको समेत सहभागिता थियो ।
वडा अध्यक्ष सोमबहादुर प्रधान,नेपाल पत्रकार महासंघ भक्तपुरका अध्यक्ष जगत प्रजापति, भक्तपुुर उद्योग वाणिज्य संघका सचिव विश्वराम दुवाल, राष्ट्रिय उपभोक्ता मञ्च भक्तपुरका अध्यक्ष मनोज थापा र भक्तपुर घरेलु कार्यालयका कर्मचारी सरस्वती पौडेल लगायतको प्रतिनिधित्व रहेको बताइएको छ ।
चाँगुनारायण नगरपालिकाका प्रमुख प्रशासकीय अधिकृत चुरामणी पन्थीले नियमित अनुगमन हुने प्रष्ट पारेका छन् । दशैँ लगायतका चाडपर्व नजिकिदै गर्दा बढ्नसक्ने ठगी, कालोबजारी र गुणस्तरहीन बस्तु तथा सेवाको बिक्रीवितरणलाई नियन्त्रण गरिने जानकारी गराउंदै उनले उपभोक्ताको हितलाई अर्जुन दृष्टि बनाएर काम गर्ने दावी गरे ।