भक्तपुर, २४ असोज २०८०राष्ट्रको लागि २ घन्टा अभियानका उपाध्यक्ष नरेश रन्जितलाई कार्यवाहक अध्यक्षको जिम्मेवारी दिइएको छ । अध्यक्ष मधु ढुङ्गेल बिदेश यात्रामा निस्किएपछि उपाध्यक्ष रन्जितलाई कार्यवाहक अध्यक्षको जिम्मेवारी दिइएको हो ।
रन्जितले कार्यवाहक अध्यक्षको जिम्मेवारी पाएका महासचिव नवराज काफ्लेले जनाएका हुन् । अध्यक्ष ढुङ्गेलको न्युजिल्यान्डमा कार्यक्रम रहेकाले रन्जितलाई कार्यवाहक अध्यक्ष तोकिएको उनले जानकारी गराए । राष्ट्रका लागि २ घण्टा अभियान भक्तपुर बाट शुरु भएको मौलिक अभियान हो । विशेषत: हरियाली प्रवर्द्धन र वातावरण सरसफाइमा यो अभियान केन्द्रीत छ । प्रत्येक हप्ता कम्तिमा २ घण्टा समाज र देशको लागि दिन प्रेरित गर्ने यो अभियानका अभियन्ताहरु भने धेरैजसो समय समाज र देशकै सेवामा तल्लीन देखिन्छन् । भक्तपुरमा अभियानले प्रत्येक शनिवार बिहान २ घण्टा राष्ट्रका नाममा सेवा पुर्याइरहेको छ । ३२ हप्ता पार गरेको अभियानमा सयौं सक्रिय अभियन्ता छन् भने हजार बढी स्वयंसेवक जोडिएका छन् । यस अघि यसका अभियन्ताहरु हनुमन्ते नदी सरसफाइ अभियानमा समेत सक्रिय रहेका थिए जुन एक सय हप्ता सम्म सफलतापूर्वक संचालन भएको थियो ।