भक्तपुर, २२ कार्तिक २०८०नेपाल पत्रकार महासंघ जिल्ला शाखा भक्तपुरले कान्तिपुर मिडिया ग्रुपबिरुद्ध श्रमजीवीको पक्षमा ऐक्यवद्धता प्रकट गरेको छ । कान्तिपुर मिडिया ग्रुपले कर्मचारी नियमावली र श्रमजीवी पत्रकार ऐन बिपरित बलजफ्ती पत्रकार निष्कासन गरेको बिरोधमा जारी आन्दोलनप्रति भक्तपुर शाखाले ऐक्यवद्धता प्रकट गरेको हो ।
कान्तिपुर मिडिया ग्रुपको थापाथलीस्थित मुलगेट अघि धर्ना कार्यक्रमलाई सम्बोधन गर्दै भक्तपुर शाखाका सचिव संजीप शुभचिन्तकले भक्तपुरका पत्रकारहरु न्यायको पक्षमा रहेकाले कान्तिपुरबाट बलपूर्वक निकालिएका पत्रकारले न्याय पाउनुपर्ने प्रष्ट पारे । कान्तिपुरलाई बलियो बनाउन पत्रकारको हात रहेको नभुल्न आग्रह गर्दै सचिव शुभचिन्तकले अन्यथा भक्तपुरमा कान्तिपुर बहिस्कारको लागि शाखाले अपिल गर्नुपर्ने अवस्था आउने चेतावनी समेत दिएका छन् ।
श्रमजीवीको रगत र पसिना खाएर कान्तिपुरलाई भलो नहुने भन्दै उनले कान्तिपुरका पिडित पत्रकारको पक्षमा केन्द्र र प्रदेशसंगै भक्तपुर जिल्ला शाखा काधमा काध मिलाएर आन्दोलनमा होमिने प्रतिवद्धता समेत प्रकट गरेका छन् । आन्दोलनमा ऐक्यवद्धता प्रकट गर्न जिल्ला शाखाका अध्यक्ष जगतकृष्ण प्रजापति पनि पुगेका थिए ।
उक्त अवसरमा केन्द्रीय अध्यक्ष बिपुल पोख्रेल र महासचिव रोशन पुरीले कान्तिपुर विरुद्ध जारी आन्दोलन श्रम अधिकार, न्याय र सत्यको लागि भएको भन्दै न्याय प्रप्ति नहुँदासम्म आन्दोलन जारी रहने उद्घोष गरे । महासंघ उपत्यका प्रदेशका अध्यक्ष श्रीजन झाको नेतृत्वमा धर्ना कार्यक्रम गरिएको थियो ।
कान्तिपुर मिडिया ग्रुपले ८२ जना पत्रकारलाई गैरकानुनी ढंगले निष्काशन गरेपछि महासंघ केन्द्रीय समितिको निर्णय अनुसार कान्तिपुर बिरुद्ध पत्रकार आन्दोलित छन् ।