भक्तपुरका नेता तथा राष्ट्रिय स्वतन्त्र पार्टीका प्रमुख सचेतकसमेत रहेका सांसद सन्तोष परियार पार्टीको केन्द्रीय समितिमा सदस्य मनोनित भएका छन् । रास्वपाको महोत्तरीमा बसेको केन्द्रीय सदस्य र सांसदहरुको बैठकले सांसदलाई स्वत: केन्द्रीय सदस्य मनोनयन गरेको हो ।

रास्वपाका हाल उपसभामुखसमेत २१ जना सांसद छन् । ७ जना यस अघि नै केन्द्रीय समितिमा अटाएका थिए भने बाकी १४ जना समेत बुधबारदेखि केन्द्रीय सदस्य बनेका छन् । रास्वपामा केन्द्रीय सदस्य थपिदा पनि विधानमा व्यवस्था गरिएको १२१ सदस्यीय केन्द्रीय समितिले पूर्णता पाएको भने छैन ।

रास्वपाको सांगठानिक संरचनामा सबैभन्दा माथि मानिएको केन्द्रीय समितिमा पर्न सांसदहरुले जोड गर्दै आएका थिए । भोलिका दिनलाई मध्यनजर गरी पार्टीले विधान नै संशोधन गरेर सांसद स्वतः केन्द्रीय सदस्य हुने व्यवस्था समेत गर्न लागेको बताइएको छ ।

बुधवारकै बैठकले सांसद समेत रहेका डा. स्वर्णिम वाग्लेलाई उपसभापति चयन गरेको छ भने अन्य आधा दर्जन नेताहरुलाई पनि सांगठनिक हैसियत प्रदान गरेको छ ।