भक्तपुर, २८ मंसिर २०८०काठमाडौं उपत्यका प्रहरी कार्यालयका प्रमुख रहेका प्रहरी अतिरिक्त महानिरिक्ष(एआइजी) दिपक थापाले नागरिकको सहयोग बिना प्रहरी अधुरो हुने बताएका छन् । प्रहरी एक्लैले अपराध न्यूनीकरण गर्न नसक्ने उल्लेख गर्दै उनले नागरिक सहयोग अपरिहार्य रहेको बताएका हुन् ।
बिहीवार सूर्यविनायक–८ डोलेश्वरमा नवनिर्मित प्रहरी चौकी भवनको उद्घाटन गर्दै एआईजी थापाले प्रहरीको सहयोगले समाज सुरक्षित हुने र समाजको सहयोगले प्रहरी बलियो बन्ने बताए । ”प्रहरीको काम अपराधी समाउने हो, नागरिकले चाहि सघाउने हो ।” उनले भने । उपत्यकामा प्रहरीको कमाण्ड सम्हालिरहेका थापाले अपराध न्यूनीकरणका लागि नागरिक प्रहरी हातेमालोको रणनीति र कार्ययोजना अनुसार काम गर्नुपर्नेमा जोड दिएका छन् ।
आफू सेवा निवृत्त भएपछि गाउँमै बस्ने खुलासा गर्दै स्थानीय समेत रहेका एआइजी थापाले डोलेश्वर प्रहरी चौकी स्थापनाले आफूलाई सन्तोष मिलेको बताए । यस चौकीको आफू पनि एक सेवाग्राही भएको भन्दै उनले नागरिक मैत्री भएर प्रहरी चौकीले शान्ति सुरक्षा लगायतका सेवा प्रवाह गर्ने विश्वास व्यक्त गरेका छन् । उक्त अवसरमा उनले प्रहरीलाई निन्द्रामा पनि तन्द्रामै रहन निर्देशन दिंदै नागरिकको शान्ति सुरक्षालाई केन्द्रमा राखेर काम गर्न मार्गनिर्देश गरेका थिए ।
कार्यक्रममा उक्त क्षेत्रका बागमति प्रदेश सभा सदस्य किरण थापाले भवन निर्माण सन्तोषजनक रहेको भन्दै अन्य आवश्यक निर्माण कार्यमा सरकारको सहयोगका लागि आफूले समन्वय गर्ने आश्वासन दिए । प्रदेश सांसद थापाले घ्याम्पे डाँडा क्षेत्रमा चोरी र लागू औषधको कारोवार बढेको जनगुनासो आएको बताउँदैं त्यस्ता गतिविधि नियन्त्रणका लागि प्रहरी युनिट परिचालन गर्न सुझाव समेत दिएका छन् ।
त्यस्तै, प्रमुख जिल्ला अधिकारी रोशनीकुमारी श्रेष्ठले सरकारको प्रमुख काम शान्ति सुरक्षा कायम गर्न भक्तपुर प्रहरीले पुर्याइरहेको योगदानप्रति सन्तोष व्यक्त गरिन । उनले प्रहरीलाई बस्न भवन निर्माणसँगै सेवाको प्रभावकारिता पनि बढ्नुपर्ने बताइन । प्रहरीलाई नागरिक मैत्री बन्न प्रोत्साहित गर्दै उनले आफ्नो सेवा भाव र व्यवहारबाट स्थानीय जनताको मन जित्नपर्नेमा जोड दिएकी छन् ।
सूर्यविनायक नगरपालिका वडा नं. ८ का अध्यक्ष पुष्पराज बस्नेतले प्रहरी चौकी भवन निर्माणसँगै डोलेश्वर क्षेत्रमा शान्ति सुरक्षाको व्यवस्था थप मजबुद भई अपराध न्यूनीकरणमा सहयोग पुग्ने विश्वास व्यक्त गरेका छन् ।
उक्त अवसरमा भवन निर्माणमा सहयोग गर्नेहरुलाई सम्मानित समेत गरिएको थियो । स्थानीय समेत रहेका जसपाका केन्द्रीय नेता दिल कुमार तामाङ्गले प्रहरी जनताको साथी भएकाले स्थानीय जनताले आवश्यक सहायोगका लागि कुनै कन्जुस्याई नगर्ने बताए ।
जिल्ला प्रहरी परिसर भक्तपुरका एसपी बेद बिष्टको अध्यक्षतामा सम्पन्न उक्त उद्घाटन कार्यक्रमको संचालन प्रहरी वृत्त जगातीकी प्रमुख रहेकी डिएसपी दिप्ती कार्कीले गरेकी थिइन् । उक्त अवसरमा काठमाडौं उपत्यका प्रहरी कार्यालयका डिआइजी लालमणी आचार्य, जिल्ला प्रहरी परिसर भक्तपुरका डिएसपी बसन्त पाठक, नेपाल पत्रकार महासंघ भक्तपुरका अध्यक्ष जगतकृष्ण प्रजापति, नेपाली सेना, सशस्त्र प्रहरी बल र राष्ट्रिय अनुसन्धान कार्यालयका प्रतिनिधिहरु त्यसैगरी स्थानीय जनप्रतिनिधिहरु, पूर्व प्रहरी उपरीक्षक ध्रुबरत्न हाडा लगायत पूर्व प्रहरी कर्मचारीहरु, पत्रकार र स्थानीय भद्रभलाद्मीहरुको उपस्थिति रहेको थियो ।
साढे दुई तल्ला रहेको डोलेश्वर प्रहरी चौकीको भवन १ करोड १२ लाख ५६ हजारमा तयार भएको चौकीका इन्चार्ज शिवशरण लुबंजारले जनाएका छन् । करिब ४ रोपनी क्षेत्रफलमा रहेको चौकीमा कार्यालय, व्यारेक, थुनुवा कक्ष, मेसलगायतको सूविधा रहेको छ । १५ जनाको दरवन्दी रहेको उक्त प्रहरी चौकीमा हाल ७ प्रहरी तैनाथ रहेका बताइएको छ ।
