भक्तपुरमा इमान्दार बामपन्थी नेताको परिचय बनाएका हरि क्षेत्रीको स्वास्थ्य अवस्थाबारे बुझ्न नेकपा(माओवादी केन्द्र) का नेताहरु उनको निजी निवास पुगेका छन् । ताथलीस्थित क्षेत्रीको निवासमा पुगी उनीहरुले स्वास्थ्य अवस्थाबारे जानकारी लिएका हुन् ।

नेकपा(माओवादी केन्द्र)का केन्द्रीय सदस्य डिपी ढकालको नेतृत्वमा जिल्ला र नगरका नेताहरु आएर स्वास्थ्य अवस्थाबारे जानकारी लिँदा नेता क्षेत्री भावुक बनेका थिए । उनले आफ्नो स्वास्थ्यको समस्या भन्दा देशको राजनीतिक अवस्था बारे चिन्ता ब्यक्त गरे । बिदेशीने युवाहरूलाई देशमै रोक्न र भुइँ मान्छेहरुको मुहारमा खुशी ल्याउन सरकारले विशेष योजना ल्याउनुपर्ने उनले आवश्यकता औल्याए ।

बागमती प्रदेश सरकारको मुख्य मन्त्रीका प्रमुख राजनीतिक सल्लाहकार समेत रहेका नेता डिपी ढकाललाई सम्बोधन गर्दै उनले जनताको समस्या सरकारलाई सुनाइदिन र राहतका कार्यक्रम ल्याउन आग्रह समेत गरेका छन् ।

उक्त अवसरमा नेता ढकालले पार्टी र पार्टी नेतृत्वको सरकारले गरेका जनपक्षीय प्रयासहरु बारे जानकारी गराउदै भक्तपुरमा गरिएका कामबारे बताए । नेता क्षेत्रीको उपचारमा आवश्यक परे भक्तपुरको सिङ्गो पार्टी र बागमती प्रदेश सरकार पनि सहयोगका लागि तत्पर रहेको उनले अवगत गराए । नेता क्षेत्रीको स्वास्थ्य लाभको कामना गर्न बागमती प्रदेश सभाकी सदस्य भुवनकेशरी श्रेष्ठ भावना, नेकपा(माओवादी केन्द्र) का जिल्ला संयोजक सुनिल गोठे, सहिद परिवार समेत रहेका पार्टीका स्थानीय नेता शिव अधिकारी, नगर इन्चार्ज रामभक्त खत्री, अध्यक्ष नरेश खड्का लगायतका माओवादी नेताहरु ताथली पुगेका थिए ।

उनी केहि महिना देखि प्यारालाइसिसको समस्याले ग्रसित रहेका र पछिल्लो समय स्वास्थ्यमा क्रमिक सुधार भैरहेको उनका भाइ सहदेव क्षेत्रीले जानकारी गराएका छन् । नेकपा (एमाले) मा राजनीति गरेका क्षेत्री नेकपा माले, माओवादी हुदै बिप्लव नेतृत्वको नेकपामा पुगी निष्क्रिय रहेका छन् । माओवादी जनयुद्धमा उल्लेखनीय योगदान गरेका उनी साम्यवादका कट्टर पक्षपाती हुन् ।