चाँगुनारायण, १० पुस २०८०जनतासंग माओवादी विशेष रुपान्तरण अभियान अन्तर्गत नेकपा (माओवादी केन्द्र)ले देशभर वडा सम्मेलन गर्न निर्देशन दिएबमोजिम भक्तपुरमा पनि वडा सम्मेलन गर्न शुरु भएको छ । भक्तपुरमा चाँगुनारायण नगरपालिकाको वडा नम्बर ८ बाट माओवादी केन्द्रले वडा सम्मेलन गर्न शुरु गरेको हो ।
भक्तपुरमा चाँगुनारायण नगरपालिकाको वडा नम्बर ८ बाट वडा सम्मेलनको खाता खुलेको खुलेको नेकपा(माओवादी केन्द्र) का जिल्ला संयोजक सुनिल गोठे बासुले बताएका हुन् । ४ वटा स्थानीय तहका ३८ वटै वडामा वडा सम्मेलन सम्पन्न गर्ने लक्ष रहेको समेत उनले स्पष्ट पारेका छन् ।
वडा सम्मेलनका लागि कम्तिमा ३ वटा टोल कमिटि गठन गरिएको हुनुपर्ने मापदण्ड रहेको उनले जानकारी गराए । तोकिएको टोल समिति गठन नगरिए वडा सम्मेलनले मान्यता नपाउने प्रदेश समितिले प्रावधान राखेको बताइएको छ । वडा सम्मेलनलाई वडामा नयाँ कार्यसमिति चयन गर्ने म्यान्डेट दिईएको प्रदेश सदस्य युवराज आचार्यले जनाएका छन् । प्रदेश समितिले आचार्य र डिल्लीप्रसाद थपलियालाई चाँगुनारायण नगरमा अभुयानको कमाण्ड दिएको छ भने केन्द्रको तर्फबाट केन्द्रीय सदस्य अमृता नेपालले जिम्मेवारी पाएकी छन् ।
सोमबार सम्पन्न चाँगुनाराय ८ को वडा सम्मेलनको उद्घाटन भने चाँगुनारायण क्षेत्रका स्थानीय समेत रहेका माओवादी केन्द्रका केन्द्रीय सदस्य डिपी ढकालले गरेका थिए । चाँगुनारायण ८ ले जनयुद्धमा बलिदानी गरेको स्मरण गर्दै उनले माओवादीका नेता कार्यकर्तामा जनयुद्धको जस्तै समाज प्रति समर्पण हुनुपर्नेमा जोड दिए ।
चाँगुनारायण ८ मा बजेटको बाढी ल्याएको बताउदै बागमती प्रदेश सरकारको मुख्य मन्त्रीका प्रमुख राजनीतिक सल्लाहकार समेत रहेका नेता ढकालले भने, ” बिकास निर्माणका ३८ वडा योजना त चाँगुनारायण ८ मा मात्रै पारिएको छ ।”
उनले काम गर्ने बेलामा सबैले माओवादी केन्द्रलाई सम्झने तर चुनावको बेला भने बिर्सने गरेका गुनासो गरे । खेत जोत्नेलाई ज्याला दिनुपर्नेमा जनताले गफ जोत्नेलाई ज्याला दिइरहेका दावी गर्दै उनले काम गर्ने आफूहरु चुनाव जित्ने अरुहरु भैरहेको बताए ।
जनतालाई माओवादी केन्द्रले गरेका कामको प्रचार हुन नसक्दा गफाडीहरुले कामको जस लिएका जिकिर गर्दै उनले आफ्ना नेता र पार्टीले गरेका कामबारेस्थानीय लाई सुसूचित गर्ने दायित्व स्थानीय पार्टी पन्ग्तिले लिनुपर्ने आवश्यता औल्याए ।
संघीयता फाल्न पाए माओवादी लाई कमजोर पार्न पाइन्छ कि भन्ने दुरासयाले संघीयता र गणतन्त्रबारे बजारमा भ्रम फ़ैलाइएको बताउदै नेता ढकालले त्यसको प्रतिरोध गर्न निर्देशन समेत दिए । गणतन्त्र र संघीयताले देशमा भएका बिकासको तथ्यांक पेश गर्दै उनले प्रशासनिक खर्च पनि संघीयताले बढाएको नभई घटाएको हिसाब प्रस्तुत गरेका थिए ।
सम्मेलनले मदन श्रेष्ठको अध्यक्षतामा २९ सदस्यीय नयाँ कार्यसमिति निर्वाचित गरेको नगर अध्यक्ष नरेश खड्काले जानकारी गराए । अध्यक्ष खड्काका अनुसार उपाध्यक्षमा बेदप्रसाद अधिकारी सचिवमा नवराज तिमल्सिना सह सचिवमा गौतम श्रेष्ठ र कोषाध्यक्षमा दीपा लामिछाने निर्वाचित भएका छन् । सिंगो कार्यसमिति नै सर्वसम्मत निर्वाचित भएको संयोजक खड्काले जनाएका छन् ।
उक्त अवसरमा बागमती प्रदेश सांसद भुवनकेशरी श्रेष्ठ भावना, पार्टीका नगर इन्चार्ज रामभक्त खत्री, सह इन्चार्ज रामलाल नेम्हाफुकी, उपाध्यक्षद्वय सुमन दाहाल र बिनोद लामिछाने त्यसतैगरी शहिदका बुवा एवं पार्टीका नेता शिव अधिकारी स्थानीय नेता राजेन्द्र तिमल्सिना लगायतको समेत सहभागिता रहेको स्थानीय नेत्री चण्डिका पाण्डेले बताएकी छन् ।