चाँगुनारायण, २९ फागुन २०८०चाँगुनारायण नगरपालिकाका मेयर जीवन खत्रीले दुवाकोट नगरकै व्यवस्थित शहर भएको बताएका छन् । द्रुत शहरीकरण र सुविधाका कारण वडा नम्बर २ स्थित दुवाकोट अन्य वडाको तुलनामा अगाडी रहेको उनको भनाइ छ ।
सोमबार दुवाकोटमोडस्थित मित्रश्री पाठशालाको अभिभावक दिवसलाई सम्बोधन गर्दै मेयर खत्रीले दुवाकोट स्वास्थ्य र शिक्षाको हब हुने समेत बताए । वीर अस्पताल दुवाकोटमै बन्ने बताउदै उनले दुवाकोटको शहरीकरणलाई थप व्यवस्थित बनाइने बताए । निर्धारित समयमा बन्न नसकेर धुलाम्मे भएको दुवाकोट सडक केही सातामै कालोपत्रे हुने ठोकुवा गर्दै उनले वीर अस्पताल पुग्ने करिडोरको बाटो पनि नमूना योग्यगरी बनाइने बताए । दुवाकोटबाट अरु वडाले पनि सिक्नेगरी नमूनायोग्य बनाइने उनले दावी गरेका छन्
शिक्षाको लागि बच्चालाई टाढाको विद्यालय पठाउन पर्ने अवस्था नरहेको जिकिर गर्दै मेयर खत्रीले नगरका सामुदायिक र सस्थागत विद्यालयले महानगरका विद्यालयसंग प्रतिस्पर्धा गरिरहेका विश्वास व्यक्त गरे । विद्यालयले शिक्षा, दीक्षा र अतिरिक्त क्रियाकलापमा कुनै कन्जुस्याई नगर्न पनि उनले निर्देशन दिएका छन् । शिक्षालाई बैज्ञानिक, व्यवहारिक र बालमैत्री बनाइनुपर्नेमा उनको जोड रहेको छ ।
उक्त अवसरमा मेयर खत्रीले बालबालिकामा सकारात्मक भावनाको बिकास गर्न अभिभावकको भूमिका माथि पनि प्रकाश पारेका छन् । अभिभावक सकारात्मक भए बालबालिकामा पनि त्यस्तै सोच बिकास हुने उनले बताए । सबैको भलो होस् भन्ने सामाजिक भावना, नैतिकताले भरिपूर्ण र राष्ट्रवादी नागरिक बनाउन परिवार, विद्यालय र सरकारले हातेमालो गरेर अघि बढ्नुपर्ने आवश्यकता औल्याउदै मेयर खत्रीले स्थानीय सरकार शिक्षा र बालबालिकाको सर्वाङ्गिण बिकासमा प्रतिवद्ध रहेको प्रष्ट पारे ।
कार्यक्रममा उनले विद्यालयका बिभिन्न विधामा उत्कृष्ट विद्यार्थीहरु त्यसैगरी अभिभावक र शिक्षकहरुलाई समेत सम्मानित गरेका थिए ।
उक्त अवसरमा वडा नम्बर २ का वडाध्यक्ष सोमप्रसाद प्रधानले मित्रश्रीले विद्यार्थीलाई पढाइका साथसाथै सामाजिक कार्यमा समेत सरिक गराउदै आएको स्मरण गरे । वडामा रहेका सबै विद्यालयलाई थप व्यवस्थित बनाइने उनले बताए । छात्रवृत्ति पाउनुपर्नेले नपाउने र नपाउनुपर्नेले पाउने अवस्था आफ्नो वडामा नहुने समेत उनको भनाइ छ ।
वार्षिकोत्सव समारोहमा विद्यालयका प्रधानाध्यापक दिपक बिष्टले विद्यालयको विगत स्मरण गर्दै वर्तमानका शैक्षिक उपलब्धिबारे बताए भने भावी योजना पनि सार्वजनिक गरेका छन् । दुवाकोट मोडमै रहेर मित्रश्रीले शिक्षाको उज्यालो छरिरहेको र आफ्नो बेग्लै पहिचान बनाएको उनले बताए । पर्याप्त भौतिक पूर्वाधार र विषय विज्ञ शिक्षकको साथमा मित्रश्री पाठशालाले गुणस्तरीय शिक्षा दिन सफल भएको उनको दावी छ ।
विद्यालयका संचालक एवं व्यवस्थापक नविन बुढाथोकीले संचालन गरेको कार्यक्रममा वडाका निर्वाचित जनप्रतिनिधिहरु, पूर्व वडाध्यक्ष शिवहरि न्यौपाने, समाजसेवी हिक्मत सिंह नेपाली, चाँगुनारायण नगर प्याब्सनका अध्यक्ष एवं नर्थ इस्टका संचालक राममणी न्यौपाने , प्रज्ञा स्कूलमा प्रिन्सिपल टंकप्रसाद सिटौला, पत्रकार महासंघ भक्तपुरका अध्यक्ष जगत प्रजापति, सचिव संजीप शुभचिन्तक त्यसैगरी पत्रकार ऋषिकेश श्रेष्ठ र सिर्जना खतिवडा लगायतको आतिथ्यता रहेको थियो ।
समारोहको दोश्रो सत्रमा विद्यालयका विद्यार्थीहरुले गायन, नृत्य लगायत विविध प्रतिभा प्रस्तुत गरेका थिए । हेर्नका लागि तलको लिंक क्लिक गर्नुहोस् ।
