भक्तपुर, ९ चैैत २०८०नयाँ वर्ष एवं बिस्का पर्वको अवसर पारेर भक्तपुरमा हरेक वर्ष झैं यस वर्ष पनि औद्योगिक, साँस्कृतिक, पर्यटन तथा व्यापार महोत्सवको आयोजना हुने भएको छ । भक्तपुरको सल्लाघारीस्थित १०८ रोपनी मैदानमा ‘८औं औद्योगिक, साँस्कृतिक, पर्यटन तथा व्यापार महोत्सव आयोजना हुने भएको हो ।
शनिवार पत्रकार सम्मेलन गर्दै आयोजकले सोबारे जानकारी गराएका हुन् । औद्योगिक शान्ति नेपाल संस्था र मध्यपुर ब्वाईज व्याण्डकोे आयोजना तथा भक्तपुर जिल्ला खेलकुद विकास समितिको सहयोगमा महोत्सव हुन लागेको आयोजक समितिका संयोजक दीपक थापाले बताएका छन् ।
महोत्सव चैत २२ गतेदेखि नयाँ वर्षको २ गते सम्मगरी ११ दिन संचालन हुने बताइएको छ । मेला सकिएपछि ३ गते भने ख्यातिप्राप्त कलाकारहरुको सहभागितामा विशेष मनोरन्जनात्मक सांस्कृतिक कार्यक्रमको आयोजना गरिने समेत संयोजक थापाले जानकारी गराए ।
महोत्सवमा २ सय भन्दा बढी स्टल रहने र सम्पूर्ण दैनिक उपभोग्य सामाग्रीहरु, खाद्यान्न,लत्ताकपडाहरुका साथै कृषि तथा हस्तकलाका सामाग्रीहरु, भाँडाकुडाका सामाग्रीहरु, ब्यापार र पर्यटन प्रवर्द्धन गर्ने स्टलहरु रहने संयोजक थापाले जनाएका छन् ।
स्टलमा बिक्री हुने सामानहरुमा २० प्रतिशतदेखि ५० प्रतिशतसम्म छुट दिने व्यवस्था गरिएको समेत बताइएको छ ।
महोत्सव करिब ५ लाख उपभोक्ताले अवलोकन गर्ने र स्टलहरुबाट करिब १० देखि १२ करोड रुपैयाको कारोबार हुने अपेक्षा गरिएको आयोजक संस्था औद्योगिक शान्ति नेपालका अध्यक्ष सन्दीप महतले जनाएका छन् । भक्तपुर ऐतिहासिक, सांस्कृतिक एवं पर्यटकीय क्षेत्र भएको र मेलाले यसको प्रचारप्रसारमा समेत सहयोग हुने महतले बिश्वास व्यक्त गरे ।
मनोरञ्जनका लागि महोत्सवमा दैनिक राष्ट्रिय स्तरका कलाकारहरुको हाँस्य व्यङ्ग्य तथा गीत संगीतको विशेष सांगीतिक प्रस्तुती रहने मध्यपुर ब्वाइज बैण्डका अध्यक्ष एवं मेलाका निर्देशक सुनिल बज्राचार्यले बताएका छन् । त्यसैगरी बाल उद्यानमा रोटे पिङ्ग, रेनजर, मारुती सर्कस, ड्रागन ब्रेक डान्स, नाउँ तथा बच्चाको खेलौना, कोलम्बस, जादु लगायतको आकर्षक व्यवस्था गरिएको बज्राचार्यले बताए ।
मेला विशुद्ध ब्यापारिक उदेश्यले मात्र नभई सेवाको उदेश्यले संचालन गर्न लागिएको आयोजकको भनाइ छ । मेलामा एउटै छानामुनी उपभोक्ताले चाहेका हरेक सामाग्रीहरु छुट मूल्यमा उपलब्ध गराईनुका साथै ब्यापार, पर्यटन, मनोरञ्जन र सामाजिक सेवाका बिबिध कार्यक्रम गरिने बताइएको छ ।
मेलामा सर्वसाधारणका लागि प्रवेश शुल्क ७० रुपैयाँ र विद्यार्थीका लागि ५० रुपैयाँ तोकिएको छ । ज्येष्ठ नागरिकलाई भने नि:शुल्क प्रवेशको व्यवस्था मिलाइएको पत्रकार सम्मेलनमा जानकारी गराइएको छ ।