भक्तपुरको मध्यपुर थिमि -३ गठ्ठाघर सागबारीस्थित आफ्नै निवासमा अचेत फेला परेका एक व्यक्तिको निधन भएको छ । साढे २ तले घरको माथिल्लो तल्लाको कोठामा एक्लै बस्दै आएका वर्ष ६७ को हरिप्रसाद अर्यालको निधन भएको हो ।

अपराह्न बेडमा अचेत अबस्थामा रहेका अर्याललाई प्रहरीले गठ्ठाघरस्थित नागरिक अस्पताल लगेकोमा सवा १ बजेको समयमा सम्बन्धित चिकित्सकले मृत घोषित गरिदिएका थिए ।

शवलाई पोष्टर्माटमको लागि के.एम.सी अस्पताल दुवाकोट लगिएको र घटनाको सम्बन्धमा थप अनुसन्धान कार्य भइरहेको जिल्ला प्रहरी परिसर भक्तपुरका सूचना अधिकारी समेत रहेका डिएसपी राजन कार्कीले जानकारी गराएका छन् ।

छोराछोरी अष्ट्रेलियामा भएका अर्याल घरमा एक्ला थिए । उनी सेवा निवृत्त शिक्षक भएका स्थानीयको भनाइ छ । दिउँसोसम्म उनलाई नदेखेपछि प्रहरीलाई खबर गरिएको थियो । राती नै उनको ज्यान गएको आशंका गरिएको छ ।