सल्लाघारीस्थित १०८ रोपनी मैदानमा जारी ८ औं भक्तपुर औद्योगिक साँस्कृतिक पर्यटन तथा व्यापार महोत्सव धुमधामका साथ् अघि बढिरहेको छ । दैनिक हजारौं मानिसहरु मेला अवलोकन गर्न आइरहेका छन् ।

बिगतका वर्षमा झैँ नयाँ वर्ष र बिस्काः जात्राको अवसर पारेर आयोजित महोत्सवमा मूख्यत: सरसामान किनमेल गर्न, खेल खेल्न र सांगीतिक प्रस्तुतीको स्वाद लिन मानिसहरु व्यस्त देखिन्छन । त्यसका अलावा विद्यार्थीहरुको स्कूल बिदाको सदुपयोग गर्न अभिभावकले मेला भर्ने मेसो मिलाएका छन् भने केही खानाका स्टलमा भोक मेटाउन पनि महोत्सवमा पस्ने गरेका भेटिन्छन । कतिपय फुर्सदिला मानिसहरुलाई भने महोत्सव दिन कटाउने स्थल बन्न पुगेको छ ।

बहुसंख्यक अवलोकनकर्ता भने सपरिवार आउने गरेका र महोत्सवलाई किनमेल देखि मनोरन्जन र घुमघामको गन्तब्य बनाउने गरेका आयोजक औधोगिक शान्ति नेपालका अध्यक्ष सन्दिप महतले बताएका छन् ।

चैत २२ गते बाट शुरु महोत्सव बिहीवार सम्ममा १ लाख जनाले अवलोकन गरिसकेका आयोजकको दावी छ । ”८ औं दिनसम्म आइपुग्दा सहभागीता उत्साहजनक रहेको छ ।” मेलाका संयोजक दिपक थापाले दावी गरे । मंगलबार भक्तपुरको प्रसिद्ध बिस्काः जात्रा सुरु भएकाले अबका दिनमा महोत्सव अवलोकन गर्ने आउनेहरुको संख्यामा थप वृद्धि हुने आयोजकको अपेक्षा छ ।

बिहीवार किनमेलसंगै गायिका अस्मिता अधिकारी, गायक दुर्गेश थापा, कुलेन्द्र विश्वकर्मा, श्रीकृष्ण बम मल्ल लगायतका कलाकारहरुको विशेष प्रस्तुतिमा अवलोकनकर्ताले सांगीतिक मज्जा लिएका थिए । आयोजक संस्था मध्यपुर ब्वाइज ब्यान्डका सुनिल महर्जनका अनुसार अहिलेसम्म राष्ट्रियस्तरका तीन दर्जन कलाकारहरुले सांगीतिक प्रस्तुती दिइसकेका छन । प्रत्येक दिन सांगीतिक कार्यक्रम  भैरहेको आयोजकको भनाइ छ ।

महोत्सवमा कृषि, पर्यटन, खाद्यान्न, लत्ताकपडा, जुत्ता, हस्तकलाका सामाग्री, भान्सामा प्रयोग गरिने सामाग्री, स्थानीय उत्पादन र खानाका परिकारसहित २ सय स्टल रहेका संयोजक दिपक थापाले जानकारी दिए । महोत्सवमा बालबालिकाको मनोरञ्जनका लागि बाल उद्यान, रोटेपिङ, ब्रेकडान्स लगायत विभिन्न खेलहरु खेल्न सकिनेछ ।

ज्येष्ठ नागरिकलाई प्रवेश शुल्क नलाग्ने महोत्सवमा विद्यार्थीलाई रु.५० र अन्यलाई भने रु.७० को प्रवेश शुल्क लाग्ने व्यवस्था गरिएको छ । महोत्सव बैशाख २ गतेसम्म संचालन हुनेछ । बैशाख ३ गते भने नेपाली भाषी भारतीय गायक विपुल क्षेत्रीको विशेष सांगीतिक कार्यक्रम हुने आयोजकले जानकारी गराएका छन् ।