भक्तपुर, ७ बैशाख २०८१के तपाईले आफ्नो ५ वर्ष मुनिका बच्चालाई ‘भिटामिन ए’ क्याप्सुल ख्वाउनुभयो ? ६ महिनादेखि ५ वर्ष मुनिका बालबालिकालाई देशैभर भिटामिन ‘ए’ क्याप्सुल खुवाइँदै छ । हिजो वैशाख ६ गते बिहिवार बाट शुरु राष्ट्रिय भिटामिन ‘ए’ कार्यक्रम’ आज शुक्रवार पनि जारी छ ।
सरकारले राष्ट्रिय भिटामिन ‘ए’ कार्यक्रम’ अन्तर्गत २०५० सालदेखि भिटामिन ‘ए’ क्याप्सुल र २०५६ सालदेखि जुकाको औषधि नियमित रुपमा नि:शुल्क खुवाउन थालेको हो । सोहीबमोजिम वैशाख ६ र ७ गते बालबालिकालाई भिटामिन ‘ए’ क्याप्सुल र जुकाको औषधी खुवाइँरहेको र भक्तपुरमा पनि यो कार्यक्रम प्रभावकारी भैरहेको स्वास्थ्य कार्यालय भक्तपुरकी प्रमुख अस्मिता ओझाले बताएकी छन् ।
बालबालिकामा हुनसक्ने स्वास्थ्य जटिलता तथा कुपोषणको जोखिम न्यूनीकरणका लागि भिटामिन ‘ए’ क्याप्सुल र जुकाको औषधी खुवाउन ओझाले अपिल गरेकी छन् । नजिकैका स्वास्थ्य स्वयम्सेविकाले नि:शुल्क भिटामिन ‘ए’ क्याप्सुल र जुकाको औषधी खुवाइँरहेको उनले जानकारी गराइन । ४ वटै नगरपालिकाका स्वास्थ्य शाखा मार्फत राष्ट्रिय भिटामिन ‘ए’ कार्यक्रमलाई भक्तपुरमा प्रभावकारी पारिएको उनको भनाइ छ ।
बालबच्चामा भिटामिन ‘ए’ को कमी भएमा अन्धोपन, छाला रोगको समस्या, शारीरिक तथा मानसिक विकासमा कमी, दाँत र हड्डीको विकासमा कमी, कुपोषण र बाल मृत्युदरको उच्च जोखिम रहने स्वास्थ्यकर्मीहरु बताउँछन् ।