भ्रष्टाचार मुद्दामा विशेष अदालतले दोषी करार गरेपछि एक सरकारी कर्मचारीले आत्महत्या गरेका छन् । सेक्युरिटी प्रिन्टिङ प्रेस खरिद प्रकरणमा दोषी ठहर भएका इन्जिनियरले भक्तपुरस्थित् आफ्नै निवासमा आत्महत्या गरेका हुन् ।

सुरक्षण मुद्रण केन्द्रको सेक्युरिटी प्रिन्टिङ प्रेस खरिद प्रकरणमा विशेष अदालतले ६ महिना कैद, ५ करोड ८४ लाख जरिवाना र बिगो बराबर रकम असुलीको फैसला सुनाएका इन्जिनियर नविनकुमार पोखरेलले बुधवार आत्महत्याको बाटो रोजेका छन् । मध्यपुर थिमि–१, लोहकिल्थलीको मनोहरा फाँटस्थित आफ्नै निवासमा झुण्डिएको अवस्थामा उनको शव फ़ेला परेको हो ।

उनलाई तत्काल उद्धार गरेर भक्तपुर इन्टरनेशनल अस्पताल कौशलटार लगेपनि चिकित्सकले मृत घोषणा गरेको नेपाल पत्रकार महासंघ भक्तपुरका अध्यक्ष समेत रहेका स्थानीय जगत कृष्ण प्रजापतिले जानकारी गराएका छन् । मृतकको घरमा सुसाईट नोट समेत फेला परेको बताइएको छ । सुसाईट नोटमा पोखरेलले आफ्नो मृत्युमा कसैको हात नभएको भन्दै अरुलाई दोष लगाएका छैनन् । उनले विशेष अदालतले ठहर गरेको रकम तिर्न नसक्ने भन्दै नोटमा ‘यो रकम म तिर्न सक्दिन’ भनेर उल्लेख गरेका बताइएको छ ।

पोखरेल शिक्षा, विज्ञान तथा प्रविधि मन्त्रालयबाट सुरक्षण मुद्रण केन्द्रमा प्रतिनिधिका रुपमा (मेकानिकल) पदमा कार्यरत रहेका थिए । अख्तियार दुरुपयोग अनुसन्धान आयोगले मुद्दा दायर गर्दा उनी वन तथा वातावरण मन्त्रालयको उपसचिव पदमा रहेका थिए ।

विशेष अदालतले गत जेठ ८ गते सुरक्षण मुद्रणका तत्कालीन कार्यकारी निर्देशक विकल पौडेलसहित इन्जिनियर पोखरेल, इञ्जिनियरिङ मार्केटिङ कन्सर्नका प्रबन्ध निर्देशक रोहितमान प्रधान र मेपटेक बिल्डिङ सर्भिसेसका निर्देशक भुवन महर्जनलाई दोषी ठहर गरेको थियो ।

अख्तियारले गुणस्तरहिन ट्रान्सफरमरलाई सम्झौतामा उल्लेख भएअनुसार नै रहेको भनी गलत विवरणसहितको प्रतिवेदन दिएको लगायत आरोपमा पोखरेल लगायतलाई मुद्दा दायर गरेको थियो । सो मुद्दामा सफाई नपाई दोषी ठहर भएपछि इन्जिनियर पोखरेलले भने आफ्नो जीवन नै अन्त्य गर्न पुगेका छन् । यसबाट उनको परिवारमा अपूरणीय क्षती पुगेको छ ।