काठमाडौं, १६ जेठ २०८१महिलामा हुने महिनावारी प्राकृतिक विषय भएकाले यसलाई जटिल बनाउन नहुनेमा सरोकारवालाले जोड दिएका छन् । दशौँ महिनावारी स्वच्छता दिवसका अवसरमा काठमाडौंमा बुधबार आयोजित कार्यक्रमका वक्ताहरुले महिनावारीलाई मर्यादित, स्वच्छ र सामान्य बनाउन परिवार नै सचेत हुनुपर्नेमा जोड दिएका हुन् ।
प्रमुख वक्ता रहेकी पूर्वमन्त्री रामकुमारी झाँक्रीले महिनावारीसम्बन्धी समस्या परिवारले नै व्यवस्थापन गर्नुपर्नेमा जोड दिइन् । अहिलेसम्म आइपुग्दा महिनावारीसम्बन्धी सोचमा धेरै हदसम्म लचकता आएको भन्दै उनले यसमा रहेका जटिल अवधारणालाई क्रमशः हटाउँदै जानुपर्ने बताइन् ।
‘यो प्राकृतिक कुरा भएकाले डरलाग्दो बनाउनु हुँदैन। परिवारले यसलाई शारीरिक परिवर्तनमध्येको एक प्रक्रियाको रुपमा स्वीकार गर्नुपर्छ’, उनले भनिन् । छाउपडीजस्ता कुरीति भत्काउन परिवार र समाज नै गम्भीर हुनुपर्ने उनको भनाइ छ ।
यसैगरी राष्ट्रिय योजना आयोगकी सदस्य प्राडा संगीता सिंहले महिनावारीसम्बन्धी अहिले देशमा प्रभावकारी नीति बनेको दाबी गरिन् । सोह्रौँ योजनामा यससम्बन्धी सोचमा परिवर्तन ल्याउन प्रभावकारी नीति बनाइएको भन्दै उनले कार्यान्यवन पक्षमा जोड दिनुपर्ने जनाइन् । अहिलेको सरकारले महिला ट्राफिक प्रहरीलाई महिनामा चार दिन छुट्टी दिनु न्याययुक्त कदम भएको भन्दै उनले सरकारको प्रशंसा गरिन् ।
पूर्वमिस नेपाल इभाना मानन्धरले देशमा विभिन्न रूपान्तरणका काममध्ये सामाजिक रूपान्तरणको काम एकदमै चुनौतीपूर्ण भएको धारणा राखिन् । कार्यक्रममा गाउँपालिका महासंघकी अध्यक्ष लक्ष्मी पाण्डेले तीनै तहका सरकारले यस विषयमा गम्भीर रहेर समाजमा प्रचलित अन्धविश्वासलाई अन्त्य गर्दै महिनावारीमैत्री मानसिकता बिकास गर्नुपर्ने बताइन ।
त्यसैगरी राष्ट्रिय महिनावारी सञ्जालका राष्ट्रिय संयोजक गुणराज श्रेष्ठले महिनावारी प्रति सामाजिक र परम्परागत धारणालाई परिवर्तन गरि मर्यादित महिनावारी बनाउन जरुरी रहेको बताएका छन् । त्यसका लागि सामुहिक अभियानको उनले आवश्यकता औल्याएका छन् ।
किशोरीहरुका दिन नेपालद्वारा आयोजित महिनावारीमा केन्द्रित चित्रकला, कविता र कथा लेखनमा उत्कृष्ट हुनेहरूलाई सो कार्यक्रममा पुरस्कृत पनि गरिएको थियो । साथै महिनावारी स्वास्थ्य शिक्षा सम्बन्धि विभिन्न संघ सस्थाहरुले सामाग्री प्रदर्शन गरेका थिए ।
अन्तर्राष्ट्रिय महिनावारी स्वच्छता दिवस यसवर्ष ‘महिनावारीमैत्री विश्वव्यापी हातेमालो’ भन्ने नाराका साथ मनाइएको छ । यो हरेक वर्षको मे २८ का दिन मनाइन्छ ।