भक्तपुर नगरपालिकाले उत्कृष्ट विद्यार्थी, शिक्षक र विद्यालय घोषणा गरी प्रोत्साहनको नीति लिएको छ । शिक्षामा अनुकरणीय अभ्यास गरिरहेको भक्तपुर नगरपालिकाले नतिजाको आधारमा उत्कृष्ट विद्यार्थी, शिक्षक र विद्यालय घोषणा गरी प्रोत्साहनको नीति लिएको हो ।

शुक्रवार १६ औं नगर सभामा आगामी आर्थिक वर्ष २०८१/८२ को नीति तथा कार्यक्रम प्रस्तुत गर्दै नगर प्रमुख सुनिल प्रजापतिले उत्कृष्ट विद्यार्थी, शिक्षक र विद्यालय घोषणा गरी प्रोत्साहन गरिने प्रष्ट पारेका हुन् । २ इञ्जिनियरिङ्ग कलेजसहित ७ शैक्षिक संस्था आफैंले संचालन गरी गुणस्तरीय शिक्षामा अब्बल सावित भक्तपुर नगरपालिकाले शिक्षालाई पहिलो प्राथमिकतामा राखेर नीति तथा कार्यक्रम सार्वजनिक गरेको छ ।

नीति तथा कार्यक्रममा शिक्षासंग सम्बन्धी १८ बुँदा रहेका छन् । पहिलो बुँदामा ख्वप: विश्वविद्यालय संचालन विधेयक पारित गराउन पहल गरिराख्ने नीति लिएको भक्तपुर नगरपालिकाले सोका लागि तयारी समिति गठन गरिने घोषणा गरेको छ भने अन्तिम बुँदामा बालविकास सहजकर्ता अर्थात इसीडी शिक्षक र विद्यालय कर्मचारीको लागि न्यूनत्तम पारिश्रमिक पाउने व्यवस्था गरिने बताइएको छ ।

चौथो बुँदामा नगर भित्रका पर्यटन , कृषी, शिक्षा, स्वास्थ्य , खानेपानी, बातावरण र सरसफाई जस्ता विषयमा अनुसन्धान गर्ने विद्यार्थीलाई नगरपालिकाले अनुसन्धान वृत्तिको व्यवस्था गर्ने उल्लेख गरिएको छ । १६ औं बुँदामा भक्तपुर नगर क्षेत्रमा संचालित कलेजहरुमा अध्ययनरत विद्यार्थीका लागि विभिन्न संघ संस्थामा इन्टर्नशीप , कार्यस्थल तालिम र आंशिक रोजगारीको समेत व्यवस्था मिलाइने बताइएको छ ।

भक्तपुर नगरपालिकाले ‘एक विद्यालय, एक सम्पदा सरसफाई’ को नीति लिएको छ भने पुस्तकालय लाई थप व्यवस्थित गर्ने उद्घोष गरेको छ । अघिल्लो वर्षहरुको नीति तथा कार्यक्रममा रहेको मानविकीका विशेष विषयहरुमा पूर्ण छात्रवृत्ती, शैक्षिक ऋण, एमफिल /पिएचडीमा दिंदै आएको प्रोत्साहन लगायतका कार्यक्रमलाई निरन्तरता दिने नीति तथा कार्यक्रममा बताइएको छ ।

सो अवसरमा प्रमुख अतिथि संघीय सांसद प्रेम सुवाल, उपप्रमुख रजनी जोशी, प्रमुख प्रशासकीय अधिकृत बसन्तप्रसाद भट्टराई, जिप्रकाका प्रशासकीय अधिकृत अशोककुमार पोखरेल, भक्तपुर उद्योग बाणिज्य संघकी अध्यक्ष रोशनी मैया धौबनजार, ख्वप: कलेज अफ इञ्जिनियरिङ्गका प्राचार्य इ. सुनिल दुवाल र ख्वप: अस्पतालका निर्देशक डा मजेशप्रताप मल्ल लगायतले नगरपालिकाको नीति तथा कार्यक्रममा टिप्पणी गर्दै नगरपालिकाको नीति तथा कार्यक्रम समाजवाद उन्मुख रहेकोप्रति सन्तोष व्यक्त गरेका थिए ।

भक्तपुरमा २६ आधारभूत विद्यालय, ७० माध्यमिक विद्यालय, ८ कलेज र २ प्राविधिक शिक्षालय रहेका छन् । नगरपालिका आफैंले ४ कलेज, २ माद्यमिक विद्यालय र १ बहुप्राविधिक अध्ययन संस्थान संचालन गरिरहेको छ । शिक्षामा ‘भक्तपुर मोडल’ हेर्न देश विदेशबाट शिक्षाप्रेमीहरु भक्तपुर नगरपालिका आउने गरेका छन् ।

हेर्नुस् भक्तपुरको नीति तथा कार्यक्रममा शिक्षा

क) शिक्षा ः
१. संघीय संसदबाट ख्वप विश्वविद्यालय सञ्चालन विधेयक पारित गराउन निरन्तर पहल जारी राखिने छ र विज्ञहरूको टोली बनाई ख्वप विश्वविद्यालय सञ्चालन तयारी समिति गठन गरिनेछ ।

२. भक्तपुर नगरपालिकाद्वारा सञ्चालित कलेजहरूमा विद्यार्थीहरूको माग र समयअनुसार स्नातक र स्नातकोत्तर तहमा नयाँ नयाँ विषयहरू थप गरिँदै लगिने छ । सीटीईभीटीबाट सम्बन्धन प्राप्त ख्वप बहुप्राविधिक अध्ययन संस्थानमा रेडियोलोजी, एचए, फार्मेसीलगायतका बिषयहरूका कक्षा सञ्चालनका लागि आवश्यक तयारी गरिने छ ।

३. भक्तपुर नपाद्वारा सञ्चालित ख्वप इन्जिनियरिङ कलेज र ख्वप कलेज अफ इन्जिनियरिङको आयोजनामा २०८१ साल माघ महिनार्मा भूकम्प इन्जिनियरिङ’ बिषयमा राष्ट्रिय सम्मेलन र २०८२ सालमा ‘भूकम्प इन्जिनियरिङ तथा विपद् पश्चातको पुनःनिर्माण’ शीर्षकमा चौथो अन्तर्राष्ट्रिय सम्मेलनको आयोजना गरिने छ । शिक्षक कर्मचारीहरूलाई उच्च शिक्षा अध्ययन (विद्यावारिधि÷एमफिल)मा दिइ आएको प्रोत्साहनलाई थप व्यवस्थित गर्दै निरन्तरता दिइने छ । त्यस्तै ख्वप कलेजमार्फत पनि अन्तर्राष्ट्रिय सम्मेलनको तयारी थालिने छ ।

४. भक्तपुर नगरपालिकाभित्रका पर्यटन, शिक्षा, स्वास्थ्य, सम्पदा पुनःनिर्माण र संरक्षण, सहकारी, कृषि, खानेपानी, वातावरण, सरसफाइजस्ता विषयहरूको अध्ययन अनुसन्धान गर्नेहरूका लागि अनुसन्धान वृत्तिको व्यवस्था गरिने छ ।

५. नगरबासी विद्यार्थीहरूलाई इतिहास, भूगोल, संस्कृति, नेपालभाषा, राजनीतिशास्त्र, दर्शनशास्त्र, तर्कशास्त्र जस्ता विषयहरूमा स्नातकदेखि विद्यावारिधिसम्म पूर्ण छात्रवृत्ति प्रदान गर्दै आएकोलाई निरन्तरता दिइने छ र उच्च शिक्षाको लागि प्रदान गर्दै आएको शैक्षिक ऋणलाई पनि निरन्तरता दिइनेछ ।

६. अनुसन्धान र सूचना व्यवस्थापन केन्द्र स्थापना गरी उच्च शैक्षिक संस्था तथा अनुसन्धानकर्ताहरूसँग सहकार्य गरी भक्तपुर नगरपालिकाभित्रका विभिन्न विषयहरूको बारेमा अध्ययन अनुसन्धानको व्यवस्था गरिने छ ।

७. शिक्षालाई ज्ञान र सीपसँग जोड्न विभिन्न प्रकारका व्यवसायिक र सीपमूलक तालिमहरू सञ्चालन गरिने छ ।

८. सामुदायिक विद्यालयहरूको शैक्षिक गुणस्तर वृद्धिका लागि समय समयमा शिक्षकहरूलाई पुनर्ताजगी तालिमहरू दिइने छ । विद्यार्थीहरूमा नागरिक भावनाको विकास गर्न नैतिक र व्यवहारिक शिक्षा प्रदान गर्ने व्यवस्था मिलाइनेछ ।

९. नेपाल भाषालाई स्थानीय पाठ्यक्रममार्फत विद्यालयहरूमा अध्ययन अध्यापनको व्यवस्था गर्न आवश्यक तयारी गरिने छ । नेपालभाषा र लिपि तथा मूर्तिकला, चित्रकला, प्रस्तरकला, संगीत, नृत्य कक्षाहरू क्रमशः सञ्चालन गर्दै लगिने छ ।

१०. विद्यालय स्तरमा अध्ययनरत विद्यार्थीहरूलाई स्थानीय जनजीवन, सम्पदा संरक्षण, खेलकुद गतिविधि, संगीत साधनाजस्ता अतिरिक्त क्रियाकलापहरूमा सहभागी गर्ने व्यवस्था मिलाइने छ । साथै समय समयमा हाजिरीजवाफ, निबन्ध, सांस्कृतिक, चित्रकला प्रतियोगिता आयोजना गरिने छ ।

११. स्थानीय पाठ्यक्रमसँग सम्बन्धित सन्दर्भ सामग्रीहरूको प्रकाशनलाई निरन्तरता दिइने छ । समयानुकूल स्थानीय पाठ्यक्रम परिमार्जन गरिने छ र भक्तपुरका सांस्कृतिक तथा सामाजिक पहिचान झल्किने सांस्कृतिक संग्रहालय निर्माणको लागि आवश्यक तयारी गरिने छ ।

१२. विद्यालयले हासिल गरेको नतिजाको आधारमा उत्कृष्ट विद्यार्थी, उत्कृष्ट शिक्षक र उत्कृष्ट विद्यालय घोषणा गरी प्रोत्साहनको व्यवस्था गरिनेछ । मावि तहको विद्यालयहरूमा क्रमशः गणित प्रयोगशालाको व्यवस्था गर्दै लगिनेछ ।

१३. ‘एक विद्यालय, एक सम्पदा सरसफाइ’ को नीतिलाई प्रभावकारी बनाइँदै लगिनेछ र विद्यालयहरूमा स्काउट टोली गठन, नियमित खेलकुद र सांस्कृतिक प्रशिक्षणको व्यवस्था मिलाइनेछ ।

१४. विद्यालयहरूको गुणस्तर वृद्धिको लागि विद्यालय अनुगमन तथा प्राविधिक सहयोग समितिबाट भइरहेको कार्यलाई समयानुकूल सुधार गरी प्रभावकारी बनाउँदै लगिनेछ । समितिको सिफारिसमा विद्यालयको भौतिक संरचना निर्माणका लागि पनि सहयोगको नीति लिइने छ ।

१५. बाल विकास केन्द्र सञ्चालन गरिएका विद्यालयहरूलाई व्यवस्थित गर्न त्यस्ता विद्यालयहरूलाई सहयोगको नीति अवलम्बन गरिनेछ र विद्यालयहरूको अबस्था हेरी कक्षा सञ्चालन तथा शिशुस्याहार केन्द्रको रुपमा विकास गरिनेछ । अपाङ्गता भएका विद्यार्थीहरूलाई प्रोत्साहनको नीति लिइनेछ ।

१६. भक्तपुर नगर क्षेत्रमा सञ्चालित कलेजहरूमा अध्ययनरत विद्यार्थीहरूलाई विभिन्न संघ संस्थामा इन्टर्नशीप, आंशिक रोजगारी र कार्यस्थलमा तालिम (अन द जब ट्रेनिङ) को व्यवस्था मिलाइनेछ ।

१७. नगरपालिकाद्वारा सञ्चालित जनज्योति पुस्तकालय र इ—लाइब्रेरीलाई अझ व्यवस्थित गर्न आवश्यक पुस्तक तथा सन्दर्भ स्रोतहरूको व्यवस्थाको साथै भौतिक सुधारहरू गर्दै लगिने छ ।

१८. ईसीडी शिक्षक तथा विद्यालय कर्मचारीको न्युनत्तम पारिश्रमिकको व्यवस्था गरिनेछ ।