भक्तपुर, २२ असार २०८१पूर्व प्रधानमन्त्री केपी शर्मा ओलीको निजी निवास बालकोटमा सुरक्षा प्रमुख रहेका सशस्त्र प्रहरी बलका प्रहरी निरीक्षक उमेश थापाको ज्यान गएको छ । गुण्डुस्थित आफ्नै घरमा सुतिरहेको अवस्थामा अचेत फेला परेका उनको ज्यान गएको हो ।
गएराती सकुशल सुतेका ४२ वर्षीय थापालाई बिहान ५: ३० बजे अचेत अवस्थामा फेला पारी ६:३० बजेको समयमा परिवारले भक्तपुर अस्पताल ल्याएको जिल्ला प्रहरी परिसर भक्तपुरका सूचना अधिकारी रहेका डिएसपी राजन कार्कीले जानकारी दिएका छन् । करिब पौने ७ बजे नै सम्बन्धीत चिकित्सकले थापाको ज्यान गएको पुष्टि गरेका उनले बताए ।
घटनाको प्रारम्भिक अनुसन्धानमा ह्दयघात देखिएको र थप अनुसन्धान भैरहेको जगाती प्रहरी बृत्तकी प्रमुख डिएसपी दिप्ती कार्कीले जनाएकी छन् । “शवलाई पोस्टमार्टमका लागि शिक्षण अस्पताल काठमाडौ पुर्याइएको छ, त्यसको रिपोर्ट आएपछि थप थाहा हुन्छ ।” डिएसपी कार्कीले भनिन् ।
मृतक थापाकी श्रीमती पनि प्रहरी सेवामै वरिष्ठ सहायक प्रहरी निरीक्षक रहेकी छन् । उनका बुबा आमा र १ छोरा छन् ।